Það hefur líklegast ekki farið framhjá mörgum að kvikmyndin Aquaman verður frumsýnd á Íslandi í vikunni, en með titilhlutverkið fer leikarinn Jason Momoa, sem sjónvarpsáhorfendur kannast einnig við úr Game of Thrones.

Jason þurfti að koma sér í gríðarlega gott form fyrir Aquaman en hann segir í samtali við E! að hann sé alls ekki að reyna að halda sér í því formi eftir að tökum lauk.

„Ég þurfti að borða minna til að grenna mig. Ég er frá Havaí – ef við borðum verðum við stór. Þannig að það er erfitt fyrir mig að grennast genalega séð,“ segir hann og bætir við að kolvetni hafi verið á bannlista við undirbúning og tökur á myndinni.

„Ég hef ekki stigið á vigt í níu mánuði. Ég borða bara brauð og smjör. Allir dagar eru svindldagar,“ segir leikarinn.

Þá segist hann einnig vera feginn að þetta ferli er búið því hann þoli ekki kviðæfingar og elski bjór. Hann getur líka huggað sig við það að gagnrýnendur eru sammála um að Aquaman sé besta DC-myndin í mörg ár og besta ofurhetjumynd ársins 2018.