Maður að nafni Leo, sem vill ekki láta geta eftirnafns síns, pantaði nýverið mat frá japönskum veitingastað nálægt hótelinu sem hann gisti á á Flórída í Bandaríkjunum. Pantaði hann matinn í gegnum heimsendingarþjónustuna Uber Eats.

Þegar að starfsmaður Uber Eats kom á svæðið segir Leo í samtali við WFLA að starfsmaðurinn hafi hegðað sér undarlega.

„Ég tók við matnum og þá hljóp hún í burtu og ég hugsaði: Þetta var skrýtið.“

Leo fór aftur inn á hótelherbergið og opnaði brúnan pappírspoka þar sem maturinn var geymdur. Hins vegar var meira í pokanum, nefnilega nærbuxur sem voru „greinilega blettóttar með einhverju sem líktist saur,“ samkvæmt Leo. Í samtali við Newsweek segir hann hafa haldið fyrst að þetta hafi verið servíetta en síðan séð að þetta væru óhreinar nærbuxur.

„Viðbjóðslegt, óheilbrigt og gæti hugsanlega dregið mann til dauða,“ segir Leo.

Leo setti nærbuxurnar aftur í pokann og hafði samband við Uber, veitingastaðinn sem hann pantaði af og lögregluna. Samkvæmt frétt Newsweek voru allir þrír aðilar skilningsríkir en sögðust ekkert geta gert í málinu. Málið verður ekki rannsakað af lögreglunni en Uber vinnur nú að því að fara yfir verklagsreglur og ferla.