Vísindamenn við háskólann Edith Cowan í Perth í Ástralíu hafa undanfarið rannsakað paleo mataræðið, eða steinaldarmataræðið svokallaða, ítarlega. Niðurstöður þeirra eru sláandi en í þeim kemur fram að mataræðið er beintengt við aukna áhættu á hjartasjúkdómum.

Stjörnukokkurinn Pete Evans gerði paleo mataræðið frægt, en í því er lögð áhersla á að borða mikið af kjöti, fisk, hnetum og fræjum en forðast korn, sykur og mjólkurvörur. Rannsóknin sem framkvæmd var við Edith Cowan er fyrsta stóra rannsóknin um mataræðið og vildu vísindamenn rannsaka áhrif mataræðisins á bakteríur í meltingarvegi.

Í niðurstöðum vísindamannanna kemur fram að helmingi meira af lykillífmerkjum sem eru tengd við hjartasjúkdóma fundust í blóði þeirra þátttakenda sem borðuðu eftir paleo mataræðinu.

Pete Evans hefur hins vegar ávallt haldið því fram að steinaldarmataræðið geti nánast læknað fólk af alvarlegum sjúkdómum sem vakið hefur upp reiði í læknasamfélaginu. Þá hafa næringarfræðingar varað við því að útiloka heilu fæðuhópana í mataræðinu því það geti haft slæm áhrif á heilsuna.

Dr. Angela Genoni stjórnaði rannsókninni við Edith Cowan-háskólann og segir að aukning á lífmerkjum í líkama þeirra sem borða eftir paleo mataræðinu virðist vera tengd við mikla neyslu á rauðu kjöti og skort á heilkorni.

„Öll korn eru á bannlista á paleo mataræðinu og við vitum að heilkorn inniheldur mikið af þolinni sterkju og gerjuðum trefjum sem eru mikilvæg fyrir heilbrigði örvera í meltingarveginum,“ segir Angela í viðtali við ástralska fréttamiðilinn News.