Farþegar sem fljúga á fyrsta farrými með breska flugfélaginu British Airways er lofað þægindum og lúxusmeðferð. Þeir fá rúmgóð sæti en er einnig boðið upp á gómsætan mat sem flugfélagið heldur fram að sé gerður úr ferskum hráefnum. Á vefsíðu British Airways kemur fram að flugvélamaturinn á fyrsta farrými sé innblásinn af réttum marga frægustu kokka heims.
Það kom því bandaríska útvarpsmanninum og höfundinum Michael Brown á óvart þegar hann las innihaldslýsingu á rétti um borð í flugi British Airways á leið frá London til Chicago og rak augun í óvæntar upplýsingar.
Á matseðlinum sem hann fékk var hjartarsteik sem var borin fram með rósmarín „dumplings“, ristuðum kastaníum og grænkáli. Fannst Michael þessi réttur hljóma vel þar til hann las næstu línuna á matseðlinum sem innihélt aðvörun til farþega.
„Þó búið sé að gæta fyllstu varúðar þá gæti verið að byssukúlubrot finnist í þessari máltíð vegna eiginleika vörunnar sem er notuð,“ stóð fyrir neðan réttinn.
Michael brá heldur betur í brún og tók mynd af viðvöruninni og deildi á Twitter. Við myndina skrifaði hann:
„Þú hlýtur að vera að grínast í mér.“
You’ve got to be kidding me. From the British Airways in-flight menu from London to Chicago. pic.twitter.com/lfecoXAllk
— Dr. Michael L. Brown (@DrMichaelLBrown) December 9, 2018
Michael segir í samtali við The Sun að hann hafi skemmt sér vel yfir þessu.
„Flugþjónarnir tveir sem ég talaði við höfðu aldrei séð eða tekið eftir þessu áður en við hlógum dátt að þessu,“ segir hann og bætir við að einn þjónninn hafi grínast með að aðvörunin væri þarna svo Bandaríkjamenn fari ekki í mál við flugfélagið.
Talsmaður British Airways staðfestir það nánast.
„Þessar aðvaranir eru varúðarráðstafanir og eru alvanalegar. Við leitum að bestu, bresku hráefnunum fyrir máltíðir í flugvélum okkar og þessi réttur er engin undantekning.“