Ellefu ára stúlka tók utan af hamborgara fjögurra ára gamals bróður síns á skyndibitastaðnum Sonic og fann pillu inni í hamborgaranum samkvæmt fréttastofunni ABC 13.
„Hún er ellefu ára þannig að hún spurði foreldra sína hvort þetta væri sælgæti,“ segir lögreglustjórinn Henry Fluck í samtali við fréttastofuna. Kom á daginn að þetta var alls ekki nammi. Pillan var í raun eiturlyfið alsæla.
Í frétt People um málið kemur fram að foreldrar stúlkunnar hafi farið beint á næstu lögreglustöð með matinn þegar að stúlkan fann pilluna. Eftir rannsókn lögreglu kom í ljós að um alsælu væri að ræða. Í kjölfarið fór lögreglan á Sonic-staðinn og handtók yfirmanninn Tanisha Dancer og tvo undirmenn hennar, þá Jonathan Roberson og Jose Molina. Er leitað var á Tanishu í Williamson County-fangelsinu kom í ljós að hún var með þrjár alsælupillur í fórum sínum, líkar þeirri sem fannst í borgaranum. Í framhaldinu var hún rekin af Sonic og kærð fyrir að stefna lífi barns í hættu og hafa eiturlyf í fórum sínum.
Talsmaður Sonic segir að fyrirtækið líti atvikið alvarlegum augum.
„Eigendur sérleyfa taka öryggi gesta og matvælaöryggi mjög alvarlega. Lögregla á staðnum er að rannsaka þetta atvik og eigandi sérleyfisins vinnur með lögreglunni að rannsókninni. Hver sérleyfishafi er sjálfstæður atvinnurekandi og þar af leiðandi ábyrgur fyrir starfsmannastefnu, starfsaðferðum og ákvörðunum. Sérleyfishafinn hefur rekið þrjá starfsmenn í tengslum við þetta atvik.“