Margir eru nú í óðaönn að baka fyrir jólin og draga einhverjir fram sínar eftirlætis smákökuuppskriftir til að njóta yfir hátíðarnar.
Oft byrja uppskriftir að smákökum, og öðru bakkelsi, á því að hræra saman smjör og sykur. Þegar að sykri er hrært saman við smjör myndast loft í deiginu sem verður til þess að smákökur verða laufléttar og loftkenndar. En þegar að flórsykri er blandað saman við smjör tapar deigið þessum eiginleika og verður þéttara í sér, þó ekkert verra fyrir vikið.
Flestir eiga sykur í eldhúsinu en færri eiga alltaf flórsykur við hendina. Hins vegar er oft gott að nota smá magn af flórsykri til að skreyta smákökur eða tertur, nú eða til að búa til glassúr á piparkökurnar, og þá er algjör óþarfi að rjúka út í búð þegar maður getur búið flórsykurinn til sjálfur.
En hvernig er það gert? Jú, flórsykur er einfaldlega fínmalaður sykur sem er blandað saman við örlítið af maíssterkju. Þannig að til að búa til flórsykur er einfaldlega hægt að setja einn bolla af sykri og eina matskeið af maíssterkju í blandara eða matvinnsluvél og mala þar til sykurinn minnir á duft. Flóknara er það ekki.