Stjörnukokkurinn Nigella Lawson er í skemmtilegu viðtali um jólin og ferilinn í New Zealand Herald. Nigellu þarf vart að kynna, en hún hefur gefið út ellefu matreiðslubækur og stjórnað fjölmörgum sjónvarpsþáttum um matargerð.
Í dag leggur Nigella mikið upp úr því að elda og baka fyrir jólin, þar á meðal ætt jólaskraut á tréð, en eftirminnilegustu jólin hennar þegar kemur að mat eru samt sem áður jólin sem hún hélt áður en frægð og frami bankaði á dyrnar.
Nigella rifjar upp jólin fyrir 25 árum síðan þegar hún bjó í London með fyrsta eiginmanni sínum, John Diamond, sem dó úr krabbameini í hálsi árið 2001. Þau voru nýbúin að eignast sitt fyrsta barn, dótturina Cosima, eða tveimur vikum fyrir jól. Til að bæta gráu ofan á svart voru þau einnig nýflutt og eldhúsið í rúst vegna breytinga.
Nýbökuð móðirin lét ekki deigan síga og reddaði jólamatnum með því að setja brauðsneiðar í samlokugrill.
„Við fengum okkur grillaða samloku og snakk í jólamatinn og það var yndislegt. Ég var uppgefin enda bara búin að vera foreldri í tvær vikur. Þetta var yndislegt. Ég setti smá trönuber í samlokuna til að gera hana jólalegri,“ segir Nigella brosandi.
Í ár fer Nigella hins vegar í mat til vinafólks á jóladag, en heldur sig þó ekki alveg frá eldavélinni.
„Ég elska að elda en verð ekki heima hjá mér. Maður getur ekki þröngvað sér of mikið upp á fólk. Ég verð heima hjá vinkonu minni og hún er mjög góður kokkur. Sonur hennar er kokkur þannig að við skiptum þessu á milli okkar.“