Julianne Brady er 63ja ára amma frá Queensland í Ástralíu sem stundar svokallað gámagrams. Hún sem sagt rótar í gámum fyrir utan stórverslanir og bjargar því sem bjargað verður, mest megnis matarkyns. Hún segist hafa sparað sér að minnsta kosti 4,5 milljónir á þessu gámagramsi.
Julianne hefur stundað gámagrams í fjögur ár og er þekkt sem Gámagrams amman í hverfinu sínu í Queensland samkvæmt frétt tímaritsins That‘s Life. Hún fær dyggan stuðning eiginmanns síns í gramsinu.
„Ég gat ekki hoppað ofan í gámana komin á þennan aldur þannig að eiginmaðurinn minn bjó til sérstakt prik fyrir mig með krók á endanum þannig að ég næði í það sem væri erfitt að nálgast,“ segir hún.
Julianne byrjaði að gámagramsa þegar hún gekk framhjá gám á bílastæði súpermarkaðs og sá heila kókdós í gámnum. Við nánari athugun fann hún ost, sultu, ólífur og kex – allt ósnert og óopnað. Henni hryllti við tilhugsunina um að þetta færi allt til spillis þannig að hún tók góssið með sér heim og hefur gámagramsað síðan. Hún líkir þessu við fíkn og byrjaði gámagramsferilinn á að heimsækja ýmsar verslanir til að kortleggja hvenær þær færu út með ruslið.
„Magnið af mat var ótrúlega mikið. Ég fékk Lindt-súkkulaðistykki, fullt af brauði, bakkelsi og ferska ávexti og grænmeti,“ segir Julianne og bætir við að níutíu prósent matvæla sem hún leggi sér til munns komi úr gámum.
Það er þó ekki aðeins matur sem hún hefur upp úr krafsinu heldur einnig jólagjafir.
„Jólin eru á næsta leiti og ég hef veitt gjafir í leynivinaleiki upp úr ruslinu,“ segir hún. Þá hefur hún einnig fundið teppi, föt, skó og rúmföt í ruslinu. Meira að segja rándýran leðurjakka. Þá bætir hún við að þetta séu ekki aðeins sparnaðaraðgerðir heldur snúist einnig um að bjarga jörðinni.