Sumir borða hamborgara með hnífapörum, aðrir taka hann báðum höndum og gúffa honum strax í sig. Hins vegar eru báðar þessar aðferðir kolrangar að mati helstu borgarasérfræðinga. Það á víst að borða hamborgara með því að snúa honum á hvolf.
Aðalástæðan fyrir því að sérfræðingar telja þetta einu réttu leiðina til að borða hamborgara er sú að botnbrauðið er mun þynnra en brauðið sem borgaranum er lokað með og því sýgur botnbrauðið betur í sig safa úr borgaranum.
Það getur verið heljarinnar verk að tækla borgara, sérstaklega nýmóðins borgara sem eru stútfullir af alls kyns gúmmulaði. Ef maður nýtir sér leiðina sem sérfræðingar mæla með þá sleppur maður alveg við að allt þetta gúmmulaði, sósa og safi fari út um allt.
Simon Dukes, stofnandi bloggsins Burger Lad, segir í samtali við INSIDER að hamborgari sé borinn fram eins og hann er vegna þess að það lítur betur út þannig. Sé honum hins vegar snúið á hvolf nær brauðið sem borgaranum er lokað með að halda öllu gúmmulaði inni í borgaranum, sökum þess hve þykkt það er.
„Sannur hamborgaraunnandi ætti alltaf að borða hamborgarann sinn á hvolfi,“ segir hann.
„Í fyrstu hefði ég sagt að þetta væri fráleitt,“ segir Matt Ester, stofnandi Burgerlist í samtali við INSIDER. „Ég hef alltaf borðað hamborgara á „réttan hátt“ en það er miklu meira vit í þessu,“ bætir hann við.