Hver hefur ekki lent í því að setja plastfilmu yfir afganga og missa næstum því vitið þar sem hún festist, flækist og virkar bara alls ekki. Það er gjörsamlega óþolandi. Nú er hins vegar komin lausn á þessu hvimleiða vandamáli.
Það er nefnilega þjóðráð að geyma plastfilmuna í frystinum. Án gríns, það svínvirkar!
Það sem gerist þegar að plastfilman er geymd í frystinum er tvíþætt. Annars vegar minnkar kaldara loft rafmagnið í plastfilmunni sem getur valdið okkur ama. Í öðru lagi breytast sameindirnar sem filman inniheldur þannig að filman festist síður saman.
Þannig að næst þegar þú brjálast og hendir plastfilmunni í gólfið því þú getur ekki meir, prófað þá að setja hana í frysti í hálftíma, hafa það náðugt í sófanum með kaffibolla og reyna síðan aftur.