Morgunkornsframleiðandinn Kellogg’s tilkynnti í vikunni að von væri á þremur nýjum morgunkornum frá fyrirtækinu á næsta ári. Um er að ræða nýjar tegundir af Rice Krispies og Frosted Flakes.

Á næsta ári verður hægt að kaupa Rice Krispies með jarðarberjabragði en þetta er fyrsta nýbreytnin sem kynnt er í Rice Krispies-morgunkorni í meira en áratug. Nú þegar eru fjórar tegundir af morgunkorninu á markaði vestan hafs.

Nýjungin í Frosted Flakes-morgunkorninu er sú að á næsta ári verður hægt að fá morgunkornið annars vegar með hunangsbragði og hins vegar með banana- og rjómabragði. Síðarnefnda tegundin hljómar vel en í henni eru flögurnar hjúpaðar með banana, rjóma og vanillu. Sú tegund verður þó aðeins til í takmarkaðan tíma.

Ætli hunangs Frosted Flakes sé ekki svar Kellogg’s við hinu vinsæla hunangs Cheerios-i frá General Mills sem hefur verið á markaðinum síðan árið 1979.