Pítsakassar eru vanalega búnir til úr bylgjupappa, en pappann má undir öllum venjulegum kringumstæðum endurvinna. Hins vegar verður að varast það að henda pítsakössum í pappatunnuna þar sem þeir geta gert meiri skaða en gagn.

Samkvæmt Stanford-háskóla í Bandaríkjunum er ekki hægt að endurvinna bylgjupappann ef hann er óhreinn því trefjarnar í pappírnum ná ekki að aðskilja sig frá olíu þegar kemur að endurvinnsluferlinu. Því er ekki hægt að endurvinna pítsakassann þegar olían hefur smogið inn í pappann.

Það er þó hægt að bjarga því sem bjargað verður. Ef til að mynda lok pítsakassans hefur ekki snert pítsuna, og olíuna sem henni fylgir, þá er hægt að rífa það af og henda því í bláu tunnuna.

Best er að henda olíubornum hlutum pítsakassans beint í ruslið því matarleifar skemma mikið fyrir þegar að pappír er endurunninn.