Súkkulaðið Milk of Nicaragua frá íslenska súkkulaðiframleiðandanum Omnom vann gullverðlaun á heimsmeistaramótinu í súkkulaðigerð síðustu helgi sem besta mjólkursúkkulaði í heimi.

Fjölmargir súkkulaðiframleiðendur víðs vegar um heiminn tóku þátt í keppninni, þar á meðal Svenska Kakaobolaget frá Svíþjóð, Friis-Holm frá Danmörku, Franceschi Chocolate frá Venesúela og Soma Chocolatemaker frá Kanada. Því eru þessu gullverðlaun mikill heiður, en auk þeirra hlaut Omnom fjögur önnur gullverðlaun, tvenn silfurverðlaun og þrenn bronsverðlaun í mismunandi flokkum.

„Það hefði aldrei hvarflað að okkur fyrir fimm árum þegar við stofnuðum Omnom að við værum að fara fá verðlaun fyrir besta mjólkursúkkulaðið. Það hefur alltaf verið í gæðastefnu okkar að nota bestu mögulegu hráefnin hverju sinni. Oft er það þannig að ef maður er með góð hráefni þá er eftirleikurinn auðveldur,“ segir Kjartan Gíslason súkkulaðigerðarmaður og annar stofnenda Omnom í fréttatilkynningu frá fyrirtækinu.

„Náin samskipti við kakóbaunabændur gerir okkur kleift að stunda heiðarleg viðskipti og auka sjálfbærni kakóbaunabænda,“ bætir hann við, en Omnom sérhæfir sig í svokölluðu frá baun í bita súkkulaði, eða from bean to bar. Það þýðir að Omnom vinnur sitt súkkulaði frá grunni úr kakóbaunum, í staðinn fyrir að bræða niður súkkulaði frá öðrum í framleiðslunni. Þetta er því ákveðinn gæðastimpill, en meðal annarra framleiðenda sem framleiða súkkulaði frá baun í bita eru til að mynda Barry Callebaut, Fazer, Ghirardelli og Valrhona.