Þriggja barna faðirinn Antonio Bramante frá Quebec í Kanada hefur kært skyndibitakeðjuna McDonald‘s fyrir brot á lögum um auglýsingar sem er beint að börnum. Ástæðan fyrir kærunni er sú að börn Antonios heimta barnabox frá McDonald‘s á tveggja vikna fresti.

Í fyrrnefndum lögum í Kanada er bannað að beina auglýsingum að börnum undir þrettán ára aldri. Þá er það líka ólöglegt að markaðssetja óheilsusamlegan mat fyrir börn.

Kemur fram í gögnum málsins að Antonio borði á McDonald‘s hálfsmánaðarlega að kröfu barna sinna. Hann telur að hann hafi eytt hundruðum kanadískra dollara í barnabox, sem eru barnamáltíðir með fríu dóti.

Aðal umkvörtunarefni Antonio er að dótið sem fylgir með barnaboxinu er oftast tengt við vinsælar myndir sem eru væntanlegar í kvikmyndahús sem þýðir að börnin vilja ólm ná að safna öllu dótinu sem í boði er á hverjum tíma. Faðirinn segir að veitingastaðurinn sé að beina auglýsingum sínum til barna með því að hafa leikföngin sem fylgja með barnaboxinu í þeirra augnhæð.

Lögfræðingur mannsins, Joey Zukran, fullyrðir að McDonald‘s fari ekki að lögum í samtali við Mirror. Hann bætir við að þeir sem hafi keypt barnabox í Quebec síðan í nóvember árið 2013 geti tekið þátt í málsókninni. Sjálfur fer Antonio fram á skaðabætur vegna þessa.

Í yfirlýsingu frá McDonald‘s kemur fram að forsvarsmenn fyrirtækisins séu að fara vel og vandlega yfir málið.