Fjölmargir þjást af ofnæmi fyrir hnetum, jafnvel svo alvarlegu að þeir þurfa að forðast hnetur með öllu til að fá ekki alvarleg ofnæmisköst. Ný meðferð gæti breytt lífi allra sem þjást af þessu ofnæmi.

Í rannsókn sem birt er í New England Journal of Medicine kemur fram að ónæmislyfið AR101 hafi verið prófað á fólki með hnetuofnæmi. Lyfið var prófað á 551 einstaklingum á öllum aldri. Þátttakendur á aldrinum 4 til 17 ára gátu þolað að minnsta kosti 600 milligrömm af hnetupróteini án þess að fá ofnæmi þegar þeir tóku lyfið.

Talið er að þessi uppgötvun marki mikil tímamót þar sem engin meðferð er til í dag fyrir fólk með lífshættulegt ofnæmi fyrir hnetum.

„Við erum spennt að geta hugsanlega hjálpað börnum og ungmennum með hnetuofnæmi og verndað þau fyrir því að borða óvart mat með hnetum í,“ segir Stephen Tilles, sem var meðal þeirra sem stóðu að rannsókninni, í samtali við fréttasíðuna EurekaAlert!.

„Við vorum ánægð með að tveir þriðju af þátttakendum gátu þolað jafngildi tveggja hneta á dag eftir níu til tólf mánaða meðferð. Og helmingur þátttakenda þoldi jafngildi fjögurra hneta,“ bætir hann við.

Stephen vonast til að þessi meðferð verði í boði fyrir almenning á seinni hluta næsta árs.