Það er oft brýnt fyrir okkur hve mikilvægt það er að drekka nóg vatn yfir daginn. Hins vegar er það staðreynd að of mikil vatnsdrykkja getur haft skaðleg áhrif á líkamann, ef marka má grein á vef Daily Mail.

Sérfræðingar vara nú við of mikilli vatnsdrykkju og segja hana geta haft skelfileg áhrif á líkamann og jafnvel dregið fólk til dauða. Fullorðinn einstaklingur ætti að drekka þrjá til fjóra lítra af vatni á dag en nýrun geta aðeins hreinsað einn lítra af vatni á klukkutíma. Umfram vatnið leitar því inn í frumur líkamans og veldur bólgu í þeim.

Þetta ferli er kallað vatnseitrun og veldur sódíum tapi í líkamanum sem gerir honum erfitt um vik að stilla blóðþrýstinginn. Það er tiltölulega hættulaust ef umfram vatnið fer í vöðva eða fitu en ef það leitar upp í heila getur það valdið miklum skaða. Einkenni vatnseitrunar eru höfuðverkur, rugl og þreyta. Ef vatnsþrýstingurinn eykst getur fólk fengið heilaskaða, fallið í dá eða jafnvel dáið.

Læknar mæla með því að fólk kíki reglulega á lit þvagsins, en best er að það sé ljós sítrónugult á litinn.

Á vef Foreldrahandbókarinnar er fjallað um vatnseitrun í börnum, sem lýsir sér eins og hjá fullorðnum að mestu leyti. Þar er vitnað í lækna við John Hopkins barnaspítalann í Baltimore í Bandaríkjunum sem brýna fyrir fólki að börn yngri en sex mánaða ættu aldrei að drekka vatn vegna hættu á vatnseitrun.

Hér eru merki um að þú sért að drekka of mikið vatn:

Tíð þvaglát
Glært þvag
Krampar
Þreyta
Þrútnar hendur og fætur
Höfuðverkir
Drekka þegar þú ert ekki þyrst/ur