Aðdáendur Game of Thrones iða í skinninu og geta vart beðið fram í apríl þegar áttunda, og síðasta serían, fer í loftið.
Sjónvarpsstöðin HBO, sem sýnir þættina, hefur gefið aðdáendum smá glaðning til að stytta þeim stundir og sett átta mismunandi viskítegundir á markað, eina tegund fyrir hverja seríu.
Viskíið er bruggað í Skotlandi og hver tegund er pöruð saman við eitt af húsunum í Westeros eða Night’s Watch, en næturvaktin fær svarta flösku sem sker sig úr hinum.
Flöskurnar eru fáanlegar núna á vefsíðunni Reserve Bar – talandi um fullkomna gjöf fyrir Game of Thrones-aðdáendur. Hver flaska kostar á bilinu 3.500 til rúmlega 12.000 krónur.