Frá og með 1. desember næstkomandi lifum við í heimi þar sem hægt er að kaupa slím sem má borða. Það er matvælarisinn JELL-O sem lætur þessi ósköp á markað, en um verður að ræða bæði einhyrninga- og skrímslaslím sem er algjörlega ætt.
Einhyrningaslímið er bleikt og með jarðarberjabragði á meðan skrímslaslímið er grænt. JELL-O lofar að einstaklega einfalt verði að blanda slímið og þurfi einungis að bæta við vatni til að hefja slímgerð. Þá taka forsvarsmenn fyrirtækisins fram að slímið sé teygjanlegt sé teygt hægt úr því.
Hægt er að forpanta æta slímið á Amazon og þar er sagt að slímgerð sé góð fyrir alla fjölskylduna og bjóði uppá góðar samverustundir. Ég efast um að margir foreldrar séu sammála því, enda slímæðið búið að tröllríða landanum svo mánuðum skiptir.
Hver slímdolla er á tæpa tíu dollara, um tólf hundruð krónur, og fer eins og áður segir í sölu þann 1. desember næstkomandi. Góða skemmtun!