Big Mac-vísitalan hefur verið birt í The Economist síðan árið 1986, en hún var smíðuð til að fylgjast á einfaldan hátt með vexti hagkerfis heimsins. The Economist birti nýverið nýja Big Mac-vísitölu, en verð á borgaranum vinsæla á McDonald‘s voru könnuð um heim allan í júlí á þessu ári. Í vísitölunni er verð miðað við bandaríska dollarann en vísitalan reynir að svara því hvort gjaldmiðlar séu rétt skráðir miðað við kaupmátt.
Ástæðan fyrir því að verð er kannað á Big Mac er út af því að McDonald‘s er stærsta skyndibitakeðja heims og Big Mac þeirra vinsælasti borgari. Einnig er borgarinn til í nánast hverju landi þar sem McDonald‘s er og er sams konar frá landi til lands. Reiknað er meðalverð á þessum vinsæla rétti í hverju landi fyrir sig.
Samkvæmt vísitölunni er dýrasti Big Mac í heimi fáanlegur í Sviss. Þar kostar hann 6.54 dollara, eða rétt rúmlega átta hundruð krónur. Í öðru sæti er Svíþjóð þar sem borgarinn er á 5.83 dollara og í því þriðja eru Bandaríkin þar sem borgarinn er seldur á 5.51 dollara stykkið, tæplega sjö hundruð krónur.
Önnur lönd á topp tíu listanum yfir dýrustu borgarana eru Noregur, Kanada, Danmörk og Ísrael svo dæmi séu tekin.
Ef við lítum hins vegar á ódýrasta Big Mac-borgarann þá er hann að finna í Egyptalandi. Þar kostar hann 1.75 dollara, rúmlega tvö hundruð krónur. Þá er borgarinn á 1.91 dollara í Úkraínu, 2.09 dollara í Rússlandi og 2.1 dollara í Malasíu.
Hægt er að sjá vísitöluna í heild sinni með því að smella hér.