Stærsti veitingastaður landsins er ekki veitingastaður IKEA eða þeir staðir sem Foodco á og rekur. Það kemur kannski einhverjum á óvart að franskur ferðarisi er sá stærsti í þessum bransa á Íslandi.
Þetta er meðal þess sem kemur fram á lista Creditinfo yfir framúrskarandi fyrirtæki í ár. Morgunblaðið greinir frá því í dag að Lagardére Travel Retail, sem rekur sex veitingastaði á Keflavíkurflugvelli, sé sá stærsti með tilliti til veltu. Árið 2017 nam veltan 3,8 milljörðum króna en veitingastaðirnir sem fyrirtækið rekur eru Kvikk Café, Loksins bar, Mathús, Nord, Pure Food Hall og Segafredo.
Hagnaður Lagardére nam tæpum 250 milljónum króna árið 2017, 80 prósentum hærri en hjá KFC sem er í öðru sæti á listanum. Þá var velta Lagardére tæplega 280 milljónum krónum hærri en hjá Foodco árið 2017, en Foodco rekur nokkra vinsæla veitingastaði hér á landi, til dæmis Roadhouse, American Style, Saffran, Aktu taktu, Eldsmiðjuna og Pítuna.