Talsmaður stórfyrirtækisins Coca Cola staðfestir í samtali við TODAY Food að búið sé að þróa nýja línu orkudrykkja hjá fyrirtækinu. Samkvæmt fréttinni er um að ræða drykkinn Coca Cola Energy og svo sykurlausa útgáfu sem heitir einfaldlega Coca Cola Energy No Sugar.

Orkudrykkirnir verða búnir til úr náttúrulega koffíni og guarana kvoðu, en guarana er planta sem er rík af andoxunarefnum og finnst helst í Amazon. Rannsóknir hafa sýnt fram á að fræ guarana innihalda allt að fjórum sinnum meira koffín en kaffibaunir. Orkudrykkir Coca Cola verði því talsvert náttúrulegri en aðrar afurðir fyrirtækisins.

Það á hins vegar eftir að gefa það út hvenær drykkirnir koma á markað en það veltur allt á málsókn sem Coca Cola á hugsanlega yfir höfði sér frá Monster Energy, vinsælum orkudrykkjaframleiðanda, sem Coca Cola fór í samstarf við árið 2015. Eiga forsvarsmenn Coca Cola eftir að fá það á hreint hvort þeir megi í raun fara í samkeppni við Monster Energy með þessum nýju orkudrykkjum.

Viðbrögðin vestan hafs við þessum fréttum hafa verið blendin og halda einhverjir því fram að kók sé nú þegar orkudrykkur, stútfullur af sykri og koffíni. Aðrir eru spenntir fyrir þessari nýjung.