Ofurfyrirsætan Bella Hadid hefur unnið fyrir tískurisa eins og Victoria’s Secret, Michael Kors, Desigual, Moschino og Versace. Hún er eftirsótt fyrirsæta, en í viðtali við tímaritið Harper’s Bazaar, fer hún yfir matarvenjur sínar.
Hún segist byrja daginn á að teygja og elda sér síðan egg og pylsur heima fyrir eða skreppur á beyglustaðinn fyrir neðan íbúð sína og fær sér beyglu með eggjum.
„Einu sinni ætlaði ég að vera heilbrigð og fékk mér glútenfría beyglu en ég lofa því að þær eru vondar,“ segir Bella í viðtalinu.
Þá kemur einnig fram að fyrirsætan sé með lágan blóðsykur og því þurfti hún að borða mjög reglulega. Ef hún er í myndatöku tekur hún yfirleitt hádegishlé klukkan 13 og fær sér próteinríka máltíð, eins og lax, kjúkling eða grænmeti.
„Mér finnst gott að fá mér góða próteinmáltíð því ég verð mjög þreytt ef ég borða of mikið þannig að ég reyni að borða mig sadda af mat sem lætur mér líða vel,“ segir hún og bætir við að hún hafi ávallt grænan safa og engiferskot við höndina í myndatökum.
Bella elskar líka kaffi og segist í viðtalinu fá sér þrjá espresso fyrir hádegi.
Þeir sem fylgjast með Bellu á Instagram ættu að vita að hún er dugleg að ferðast um heiminn vegna vinnunnar. Í viðtali við PEOPLE fyrir stuttu sagðist hún reyna að halda í sínar matarvenjur á ferðalögum.
„Mér finnst gott að borða hollt en ekki hræðilegan flugvélamat. Ég held mataræðinu hollu og drekk mikið vatn. Það er í raun það eina sem ég geri,“ lét hún þá hafa eftir sér. Í viðtali við Vogue Paris sagðist hún einnig borða bæði fyrir og eftir æfingar. Hálftíma fyrir æfingar fær hún sér þeyting, safa eða próteindrykk en eftir æfingu fær hún sér próteinríka máltíð.
Svo má ekki gleyma þeim fjölmörgu myndum af pítsum sem birtast á Instagram-síðu fyrirsætunnar, en á tyllidögum gerir hún vel við sig með því að fá sér pítsu eða kleinuhring.