Eldheitar umræður sköpuðust um gamla, góða Royal-búðinginn fyrir stuttu inni á Facebook-hópnum Matartips. Voru margir á því að bragðið hefði breyst til hins verra.
„Af hverju ætli Royal-karamellubúðingurinn sé orðinn svona litlaus og fölur? Já, og bragðið hefur breyst líka. P.s. Bragðlaukarnir mínir og sjónin er í fínu lagi,“ skrifar manneskjan sem stofnar til þráðarins sem hefur skapað mikil skoðanaskipti.
„Þetta er ekki sami búðingurinn og var. Allt annað bragð af þessum,“ segir einn Facebook-notandi og aðrir taka í sama streng:
„Sammála, hann er frekar bragðlítill. Ekki sá sami og áður.“
„Ég var með vanillubúðing í gær einmitt. Langt síðan síðast og mér fannst hann einmitt svo bragðlaus.“
„Nákvæmlega. Litljótur og bragðdaufur.“
Einhverjir benda á það innan hópsins að búðingnum hafi verið breytt fyrir mörgum árum, og einhverjum finnst að ætti að taka þá breytingu til baka.
„Þeir mega alveg breyta aftur. Alls ekki góður ef það er raunin að þeir séu að breyta honum,“ skrifar einn matgæðingur.
Matarvefurinn hafði samband við Stefán S. Guðjónsson, forstjóra John Lindsay hf., sem selur Royal-búðinginn, til að fá úr þessu skorið. Hann segir vissulega að uppskriftinni hafi verið breytt en telur það ekki koma niður á bragðinu.
„Við höfum ávallt kappkostað að nota náttúruleg bragð- og litarefni og höfum þess vegna þurft að breyta hráefnum. Einhverjir hafa fullyrt við okkur að þetta hafi leitt til breytinga. En samkvæmt okkar formúlu er ekkert hæft í því,“ segir Stefán. Hann segir það koma til greina að bragðlaukar fólks þróist og breytist með aldrinum.
„Bragðið hefur lítið breyst í tímans rás. Auðvitað er það þannig að bæði bragðskyn fólks og smekkur breytist í gegnum árin. Gamli, góði Royal-búðingurinn smakkast alltaf jafn vel.“
Nú ætlar matarvefurinn ekki að leggja mat á breytingar á Royal-búðingnum sem hefur fylgt þjóðinni í áratugi, en vill hins vegar benda á að tilvalið er að nota skyndibúðinga í alls kyns bakstur, til dæmis þessa kanilsnúða sem eru óviðjafnanlegir:
Snúðar – Hráefni:
4 msk volgt vatn
6 msk volgt smjör
1 pakki Royal-vanillubúðingur
2 ½ dl rjómi
2 egg
1 msk sykur
1 tsk sjávarsalt
500 g hveiti
1 pakki þurrger
Fylling – Hráefni:
3-6 msk brætt smjör
200 g púðursykur
4 tsk kanill
Aðferð:
Hitið rjómann. Setjið öll hráefnin sem eiga heima í snúðunum í skál og hellið rjómanum yfir. Hnoðið vel saman. Stráið hveiti yfir deigið, breiðið yfir það klút og látið það hefast þar til það hefur tvöfaldast. Setjið deigið á borðflöt sem búið er að strá hveiti á og fletjið út eins þunnt og þið mögulega getið. Smyrjið deigið með smjöri og stráið púðursykri og kanil. Rúllið deiginu upp og skerið í bita. Setjið klút yfir snúðana og leyfið þeim að hefast aftur. Hitið ofninn í 200°C og bakið snúðana í um 15 mínútur.
