Það hafa eflaust flestir lent í því einhvern tímann á ævinni að rústa köku, hvort sem hún festist í forminu eða hrynur í sundur þegar hún er tekin úr ofninum. Þá er líka ofboðslega leiðinlegt þegar kökur falla og verða flatar. Ef er hins vegar í lagi með bragðið eru ýmsar leiðir til að redda kökunni.
Kökupinnar krefjast smá nosturs en það er ofboðslega einfalt samt sem áður. Eina sem þarf að gera er að blanda saman kökumylsnu og kremi og passa að deigið verði ekki of blautt. Síðan eru kúlur mótaðar úr deiginu og frystar. Því næst er öðrum enda á sleikjópinna dýft í brætt súkkulaði og stungið í kúluna. Þegar súkkulaðið storknar er allri kúlunni síðan dýft í brætt súkkulaði og skreytt. Fallegt og skemmtilegt á veisluborðið.
Triffli er algjör snilld. Þá er beinlínis bara hægt að búta glötuðu kökuna niður, raða hluta af henni í botn á stórri skál eða formi, þeyta síðan rjóma og skella ofan á, síðan einhverju sætu eða ávöxtum og endurtaka þetta síðan þar til skálin er full.
Stundum eru kökur ekki það illa farnar að hægt er að smyrja bara nógu mikið af kremi á þær til að bjarga þeim.
Brjálaðir mjólkurhristingar hafa verið mjög vinsælir síðustu misseri. Oft eru þeytingarnar skreyttir með sætindum, allt frá kleinuhringjum til sælgætis. Því er tilvalið að skella smá kremi og kökuskrauti á kökuna og skreyta mjólkurhristing með litlum bita af henni.
Hefðbundnar trufflur eru búnar til úr til dæmis smjöri, súkkulaði og rjóma en það er leikur einn að bæta smá kökumylsnu í trufflurnar. Svo er líka æði að blanda saman rjómaosti, söxuðum jarðarberjum og kökumylsnu og búa til trufflur úr því. Jafnvel súkkulaðihúðaðar.
Eða þið getið bara skorið kökuna í bita og borið hana fram með ís.
