Kjúklingur er vinsæll til eldunar á mörgum heimilum, en kjúklingur sem er ekki vel eldaður getur orsakað matareitrun. Ef kjúklingurinn er hins vegar ofeldaður verður hann þurr og ógirnilegur.
Þumalputtareglan er að kjarnhiti kjúklingakjöts á að vera 70°C þegar það er borið fram. Þeir sem eiga hins vegar ekki kjöthitamæli geta fylgt eftirfarandi, almennu leiðbeiningum þegar matreiða á kjúklingabringu.
Grilla skal kjúklingabringu í 6 til 8 mínútur á hvorri hlið ef kjötið kemst í tæri við opinn eld. Ef ekki þá er bringan grilluð í 10 til 12 mínútur á hvorri hlið.
Baka skal kjúklingabringu í ofni í 20 til 30 mínútur við 190°C.
Ef bringan er steikt á háum hita skal steikja hana í 2 mínútur á hvorri hlið. Ef um meðalhita er að ræða skal steikja bringuna í 4 til 6 mínútur á hvorri hlið.
Steikja þarf kjúklingabringu í 8 til 12 mínútur í olíu sem hefur náð um það bil 180°C hita.