Þá er komið að því vikulega hér á matarvefnum – nefnilega matseðli vikunnar fyrir virku dagana í vikunni. Vonandi veitir þessi matseðill fólki einhvern innblástur í eldhúsinu en á seðlinum kennir ýmissa grasa. Hér á eftir er til dæmis lax fylltur með spínati og fetaosti, vegan súpa og geggjuð föstudagspítsa. Njótið!
Uppskrift af This Healthy Table
Hráefni:
2 msk. ólífuolía
4 laxaflök
1 meðalstór laukur, skorinn smátt
2 hvítlauksgeirar, smátt saxaðir
3 bollar „baby“ spínat
1/3 bolli fetaostur
spírur til skreytingar, má sleppa
Aðferð:
Hitið ofninn í 200°C. Hitið 1 matskeið af olíu á stórri pönnu yfir meðalhita. Steikið laukinn í 2 mínútur, bætið svo hvítlauk saman við og steikið í 1 til 2 mínútur í viðbót. Bætið spínatinu saman við og eldið í 30 sekúndur, eða þar til það fölnar. Takið af hitanum og hrærið fetaostinum saman við. Skerið langsum í síður laxaflakanna þannig að úr verður það sem minnir á vasa. Skiptið spínatblönduna í 4 hluta og fyllið hvert flak með einum hluta af blöndunni. Raðið flökunum á ofnplötu og drissið restinni af olíunni á þau. Bakið í 8 til 10 mínútur og skreyið með spírum.
Uppskrift af Cookie + Kate
Hráefni:
6 bollar grænmetissoð
1 meðalstór rauðlaukur, smátt saxaður
2 msk. ferskt engifer, smátt saxað
4 hvítlauksgeirar, smátt saxaðir
1 tsk. salt
1 grænkálsbúnt, laufin tekin af stilkum og skorið í mjóa renninga
¾ bolli ósaltað vegan hnetusmjör
½ bolli tómatpúrra
„hot sauce“
¼ bolli salthnetur, grófsaxaðar
Aðferð:
Takið til stóran pott og hellið soðinu í hann. Náið upp suðu í soðinu yfir meðalhita. Bætið síðan lauk, engiferi, hvítlauk og salti saman við. Látið malla í 20 mínútur. Blandið hnetusmjöri og tómatpúrru saman í stórri skál sem þolir hita. Blandið síðan 1 til 2 bollum af heitu soðinu saman við og þeytið þar til blandan er silkimjúk. Hellið hnetublöndunni síðan saman við soðið í pottinum og hrærið vel saman. Hrærið grænkáli saman við og „hot sauce“ eftir smekk. Látið malla í 15 mínútur til viðbótar og hrærið reglulega í blöndunni. Skreytið með salthnetum og berið jafnvel fram með hrísgrjónum eða brauði.
Hráefni:
8 lambalundir
½ poki sólblómafræ
1 dl sojasósa
1 stk. paprika
2 msk. þykkt balsamikedik
1 dl ólífuolía
1 msk. sesamolía
fersk græn salatblanda
Aðferð:
Setjið olíu á heita pönnu. Ristið sólblómafræ á vel heitri pönnu þar til þau eru gyllt, þá er sojasósunni hellt yfir og látið malla þar til vökvinn er horfinn og síðan eru fræin þerruð á pappír. Setjið olíu á vel heita pönnu, steikið lundirnar, 2 mínútur á hvorri hlið. Látið kjötið hvíla í um það bil 3 mínútur. Hitið síðan í ofni í 2 mínútur við 180°C og látið svo hvíla aftur í um það bil 3 mínútur. Skolið salatið og setjið í skál með smátt skorinni papriku. Skerið lambakjötið þunnar sneiðar og breiðið yfir salatið, stráið fræjunum yfir lambakjötið . Sólblómafræin verða því kryddið á kjötið. Blandið balsamikediki, ólífuolíu og sesamolíunni saman í skál og hellið yfir salatið.
Uppskrift af Spend With Pennies
Hráefni:
500 g lamba- eða nautahakk
1 meðalstór laukur, smátt skorinn
2 hvítlauksgeirar, maukaðir með hvítlaukspressu
280 g frosnar baunir og gulrætur, afþýddar
280 g maískorn
280 g tómat- eða sveppasúpa í dós
2 tsk. Worcestershire-sósa
½ tsk. salt
¼ tsk. basilkrydd
1/8 tsk. pipar
3 bollar kartöflumús
1 bolli rifinn cheddar ostur
Aðferð:
Hitið ofninn í 200°C. Eldið hakkið, lauk og hvítlauk yfir meðalhita þar til hakkið er eldað í gegn. Hellið allri fitu af. Blandið súpu, Worcestershire-sósu, salti, basil og pipar saman við og dreifið þessu í botninn í eldföstu móti. Dreifið baunum, gulrótum og maískornum yfir hakkblönduna. Dreifið síðan kartöflumúsinni yfir grænmetið og drissið cheddar ostinum ofan á. Bakið í 25 til 30 mínútur.
Uppskrift af My Purple Spoon
Botn – Hráefni:
1 bréf þurrger
1 bolli volgt vatn
1 tsk. kókossykur
2 ½ bolli heilhveiti
2 msk. ólífuolía
1 tsk. salt
Aðferð:
Blandið þurrgeri, sykri og vatni saman í meðalstórri skál og leyfið þessu að bíða í 5 mínútur, eða þar til blandan freyðir. Blandið restinni af hráefnunum saman við. Leyfið deiginu að hefast í korter, hnoðið síðan í smá stund og fletjið út á ofnplötu.
Álegg – Hráefni:
grænt pestó, heimagert eða keypt í verslun
115 g kjúklingur, rifinn niður
115 g rifinn ostur
1 meðalstór tómatur, skorinn í sneiðar
ferskt basil, smátt saxað
dass af chili flögum (má sleppa)
Aðferð:
Hitið ofninn í 220°C. Smyrjið þunnu lagi af pestói á botninn. Bætið restinni af hráefnunum ofan á pítsuna og bakið í 25 til 35 mínútur, eða þar til botninn er farinn að brúnast.
Sítrónusalat – Hráefni:
3 bollar klettasalat
1 msk. ólífuolía
safi úr ½ sítrónu
salt og pipar
Aðferð:
Blandið öllu saman í stórri skál. Þegar pítsan er komin úr ofninum og búin að kólna lítið eitt er klettasalatinu dreift yfir.
