Við á matarvefnum erum í skýjunum með liðsauka sem okkur hefur borist. Erla Þóra Bergmann Pálmadóttir verður 21 árs í nóvember og útskrifaðist sem matreiðslumaður frá Menntaskólanum í Kópavogi síðasta sumar. Hún ætlar að deila ástríðu sinni með lesendum matarvefs DV með reglulegum pistlum framvegis. Erla hefur verið viðriðin veitingabransann síðan hún var unglingur og elskar að vera í eldhúsinu.
„Ég hef alltaf haft hrikalega mikinn áhuga á mat og öllu sem tengist honum. Á fjórtán ára afmælisdaginn minn buðu mamma og pabbi mér og systur minni út að borða á Tapas barinn. Pabbi vissi þá að ég var ansi ákveðin í að verða kokkur þannig að hann nefndi það við eigandann þar sem hann þekkti hann nokkuð vel. Þá bauð hann mér að prufa að vinna í eldhúsinu þar og ég var sko heldur betur til í það. Fljótlega eftir það byrjaði ég að hjálpa til í eldhúsinu og fór beint á samning á Tapas barnum eftir að ég útskrifaðist úr grunnskóla,“ segir Erla sem er afar þakklát fyrir þennan tíma.
„Ég myndi segja að ég hafi lært ótrúlega mikið þarna og ég var heldur betur umkringd yndislegu fólki.“
Í dag vinnur Erla á Apótek Restaurant og stefnir á að klára meistaranám næsta vor. Hún vinnur mikið en þegar hún á stund milli stríða snýst heimurinn hennar nánast eingöngu um mat og matargerð.
„Ég elska að lesa matreiðslublöð og -bækur og horfa á matreiðsluþætti. Síðan finnst mér að sjálfsögðu ótrúlega gaman að dunda mér í eldhúsinu tímunum saman. Ég hef alveg síðan ég man eftir mér haft rosalega mikinn áhuga á öllu sem tengist mat og man ég sérstaklega vel eftir því að vera standandi uppi á
stól að elda með mömmu. Það mætti segja að ég hafi náð að troða mér með alls staðar þar sem einhver var að bralla eitthvað tengt mat,“ segir Erla og hlær.
Erla sækir sér í innblástur með því að fara út að borða, hér heima og erlendis, og sjá hvað aðrir eru að sýsla með mat. Hún er hokin af reynslu þrátt fyrir ungan aldur og hlakkar til að deila sinni þekkingu með lesendum matarvefs DV.
„Fyrst og fremst vil ég bjóða lesendum DV upp á skemmtilegar uppskriftir, allt frá einföldum og upp í flóknari uppskriftir fyrir þá sem vilja spreyta sig extra mikið í eldhúsinu. Ég vona að ég geti deilt með fólki skemmtilegum hugmyndum, ráðum og uppskriftum.“
Við bjóðum Erlu hjartanlega velkomna í hópinn.
