Jackie Page er 77 ára og hefur ekki drukkið aðra drykki en Pepsi í 64 ár. Hún smakkaði fyrst Pepsi þegar hún var þrettán ára, árið 1954, og segist í dag ekki myndu drekka vatn þó líf hennar lægi við. Jackie drekkur fjórar dósi af Pepsi á dag og hefur innbyrt það sem nemur þremur milljónum sykurmola síðan Pepsi-neyslan hófst.
„Ég kalla þetta ekki fíkn. Þetta er bara eitthvað sem mér finnst gott og ég get ekki gert að því að mér finnst ekkert annað gott,“ segir Jackie í samtali við breska miðilinn The Mirror.
„Sumum gæti þótt þetta skrýtið og að maður ætti ekki að drekka Pepsi í dag. En mér er sama og ég sætti mig ekki við neitt annað. Ég myndi aldrei drekka vatn – glætan. Ekki einu sinni ef lífið lægi við. Og ég vil ekki drekka te eða kaffi,“ segir þessi hressa langamma.
Jackie er hörð á því að drekka bara Pepsi úr dós – ekki úr gleri. Hún heldur því statt og stöðugt fram að Pepsi-neyslan hafi ekki haft nein slæm áhrif á heilsuna.
„Ég var alltaf mjög, mjög grönn þar til fyrir fimm árum – en ég held að það sé út af því að ég hreyfi mig ekki eins mikið og ég gerði,“ segir hún. „Þeir segja að Pepsi sé vont fyrir tennurnar en ég fæddist í stríðinu og það eru ekki mörg okkar sem eru ekki með rotnar tennur, þannig að ég veit ekkert um það.“
Á þessum 64 árum hefur Jackie drukkið rúmlega 93 þúsund dósir, sem hafa kostað hana rúmlega tíu milljónir króna. Hún segir að móðir hennar hafi átt í stökustu vandræðum með að fá hana til að drekka þegar hún var barn.
„Mér finnst mjólk og vatn vont. Mamma sagði við mig að ég þyrfit að drekka eitthvað. Ég veit að hún gaf mér stundum límónaði eða kirsuberjadrykk,“ segir Jackie. „Ég drakk ekki til að njóta. Drykkja var eitthvað sem ég umbar áður en ég smakkaði Pepsi.“
Einu skiptin sem Jackie hefur hætt að drekka Pepsi var þegar hún var á spítala að eiga börnin sín fjögur. Það var á sjöunda áratug síðustu aldar og Pepsi var bannað á fæðingardeildinni.
„En ég hef farið á sjúkrahúsið síðan í stórar aðgerðir og þá mátti ég taka það með mér. Starfsfólkið fylltist viðbjóði en það leyfði mér að geyma Pepsi í ísskápnum í eldhúsinu því ég vildi ekki drekka neitt annað. Börnin mín heimsóttu mig á sjúkrahúsið með birgðir af því svo ég myndi ekki þorna upp.“
Í dag fylgja barnabörnin hennar ellefu og barnabarnabörnin hennar átta þeim ströngu reglum að halda sig frá Pepsi-birgðunum hennar þegar þau heimasækja hana á heimili sínu í Surrey.
