„Ég fór til London fyrr á árinu en í Bretlandi eru að spretta upp mjög kasjúal hamborgarastaðir, eins og til dæmis Gourmet Burger Kitchen og Bleeker. Á þessum stöðum er mikið lagt upp úr gæðum í mat en allt annað rosalega hrátt. Ég var mjög hrifinn af þessu og hélt að þetta myndi skotganga hérna heima,“ segir Guðni Vignir Samúelsson. Guðni opnaði nýverið hamborgarastaðinn Craft Burger Kitchen ásamt Emil Helga Lárusson, sem á veitingastaðakeðjuna Serrano.
Þó Craft Burger Kitchen sé hamborgarastaður segir Guðni að hann sé langt því frá hefðbundinn.
„Við reynum að gera öðruvísi tvist á matinn. Við verðum með hefðbundna rétti, eins og ostborgara, beikonborgara og þess háttar. En við gerum þetta aðeins öðruvísi. Við bjóðum til að mynda upp á „dry aged“ blöndu sem við erum búnir að þróa og er rosalega góð. Þá erum við einnig með það sem kallað er Porchetta sem er svínasíða sem er rúlluð upp með purunni, krydduð að innan og langtímaelduð. Ég veit ekki til þess að það sé í boði hér á landi. Síðan erum við að sjálfsögðu með vegan borgara og alls kyns meðlæti eins og franskar, sætkartöflu franskar, hrásalat og djúpsteikt grænmeti.“
Guðni og Emil hafa þekkst lengi, en Guðni hefur verið að vinna á Serrano meira og minna frá árinu 2008. Guðni er kokkur en þetta er í fyrsta sinn sem hann opnar sinn eigin veitingastað. Hann er að vonum mjög glaður með að þessi draumur sé orðinn að veruleika.
„Þetta er mjög spennandi. Ég var búinn að stefna að þessu í smá tíma, að opna mitt eigið konsept. Ég er spenntur fyrir vörunni sem ég hef í höndunum. Ég er búinn að sjá um ákveðnar hliðar af rekstrinum á Serrano í mörg ár, þannig að sumt er nýtt fyrir mér, annað ekki,“ segir Guðni.
Craft Burger Kitchen er í Kópavogi, nánar tiltekið á Nýbýlavegi 6-8, og er Guðni hæstánægður með að bæta staðnum inn í veitingastaðaflóruna í Kópavogi.
„Þetta er góð staðsetning og mjög miðsvæðis. Hér býr mikið af fólki og margir vinnustaðir hér í kring. Það er auðvelt aðgengi og til dæmis ekkert mál að fá bílastæði,“ segir Guðni og útilokar ekki að annað útibú verði opnað ef allt gengur vel. „Það er hollt og gott að auka samkeppni – það eykur flóruna í veitingastöðum.“
En þurfa Íslendingar enn einn hamborgarastaðinn?
„Já, það er alltaf hægt að bæta á sig. Þetta er einn vinsælasti skyndibitinn og hægt að tvíka hann fram og til baka. Hamborgari er nefnilega ekki bara hamborgari. Ég verð alltaf fyrir jafn miklum vonbrigðum þegar ég fæ vondan hamborgara eða vondar franskar,“ segir Guðni.
Hver er þá galdurinn á bak við góðan hamborgara?
„Fyrst og fremst er það gott kjöt. Við erum búnir að leggja mikla vinnu í að fá réttu blönduna og viljum alls ekki kaffæra kjötinu í bragði. Allt sem við setjum á borgarana lyftir kjötinu og bragðinu upp. Við leggjum mikið upp úr því að fá gæðahráefni og hlökkum til að setja þetta í dóm fólksins.“