Fleiri og fleiri ákveða að borða vegan út frá siðferðislegum, heilsufarslegum eða umhverfislegum sjónarmiðum. Þeir sem borða vegan neyta hvorki kjöts né dýraafurða og getur það vaxið einhverjum í augu að breyta mataræði sínu á svo dramatískan hátt. Hér eru hins vegar sjö ráð sem geta auðveldað þér að verða vegan.
Ekki henda þér út í nýjan heim af matvælum án þess að undirbúa þig. Þér á eflaust eftir að finnast það erfitt að skipta yfir í vegan mataræði þannig að taktu bara eitt skref í einu. Byrjaðu til dæmis á því að taka út mjólkurafurðir úr mataræði sínu, síðan kjöt og því næst egg. Eða borðaðu bara vegan tvo daga vikunnar í mánuð áður en þú skiptir alveg yfir í vegan mataræði.
Flestir veitingastaðir bjóða upp á vegan valkost í mat og því er ekkert því til fyrirstöðu að fara út að borða í góðra vina hópi. Ef þú ert ekki viss hvar vegan mat er að finna er smáforritið The Happy Cow algjör snilld í leitinni.
Búðu þig undir að kjötætur spyrji þig skrýtinna spurninga eins og: „Þú mátt samt enn þá borða fisk?“ eða hendi fram fullyrðingum eins og: „Mér finnst vegan fólk svo yfirlætisfullt. Ég borða bara dýr sem er slátrað á mannúðlegan hátt.“ Ekki láta þetta á þig fá en reyndu að leiða fólkið sem finnst veganismi óþægilegur hjá þér.
Á Facebook er að finna hóp sem heitir Vegan Ísland þar sem er fullt af grænkerum sem eru til í að miðla reynslu sinni. Þetta er frábært stuðningsnet ef þú leitar svara við vegan tengdum spurningum.
Framleiðendur þurfa að taka fram ef matvæli innihalda til dæmis mjólk eða egg, þar sem þau matvæli eru ofnæmisvaldandi. Ef að sagt er á innihaldslýsingu að matvæli gæti hugsanlega innihaldið mjólk þá þýðir það einfaldlega að maturinn var framleiddur á stað þar sem mjólk er einnig notuð í framleiðslu. Sá matur getur þá alveg verið vegan. Þannig að lestu innihaldslýsingar og ekki hika við að varpa fram spurningum í fyrrnefndum Facebook-hópi ef þú ert óviss með eitthvað.
Það er hægt að kaupa vegan útgáfur af næstum því öllu, allt frá hamborgurum til djúpsteikts kjúklings. Prófaðu svoleiðis vörur til að blekkja hugann þegar hann biður um kjöt eða dýraafurðir. Það gæti einfaldað lífið töluvert og gert ferlið að skipta yfir í veganisma einfaldara.
Þegar þér fallast hendur er gott að minna sig á af hverju þú ákvaðst að verða grænkeri, sama hverjar ástæðurnar eru. Það borgar sig að hafa í huga að það er góð ástæða fyrir því að þú skiptir yfir í veganisma og gerir þig öruggari í eigin vegan lífsstíl.
