Night School-leikkonan Megalyn Echikunwoke opnar sig upp á gátt í stuttu viðtali við matartímaritið Bon Appétit, en hún er hvað þekktust fyrir leik í sjónvarpsþáttunum CSI: Miami og The 4400. Hún segist reyna að hlusta á líkamann til að lifa heilbrigðu lífi.
„Ég held að vellíðan komi af því að hlusta á líkamann, að skilja hvernig þú átt að halda þér heilbrigðum og að grípa til fyrirbyggjandi aðgerða þegar maður getur til að styðja líkamann. Ég held að það að vinna við það sem þú elskar sé form af vellíðan,“ segir leikkonan, en hún heldur sér í líkamlegu formi með því að dansa.
„Ég held að ég eigi örugglega eftir að æfa ballett þangað til ég verð áttræð. Eða, ég vona það allavega.“
Þá segist hún harðneita að fara í megrun.
„Ég hata matardólga og ég hata að þurfa stanslaust að finna nafn á mataræðið mitt. Ég er ekki ein týpa af mathák – ég borða bara það sem lætur mér líða vel. Ég reyni að halda blóðsykrinum í lagi, en sem betur fer hef ég enga löngun í sætindi og mér er sama þó ég fái engan eftirrétt,“ segir hún, en veikleiki hennar er eitthvað sem margir geta ekki byrjað daginn án.
„Kaffi. Ég þarf klárlega mikið af kaffi yfir daginn. Ég læt líka áfengan drykk eftir mér stundum.“
Megalyn segist þrífast á áskorunum og að sér líði best þegar henni líði óþægilega.
„Mér finnst gaman að finna út úr hlutunum og mér finnst gott að vera týnd í borg. Það er ein af ástæðunum fyrir því að ég elska að ferðast,“ segir hún og gefur ungu fólki góð ráð áður en hún kveður blaðamann.
„Verið forvitin. Og fyrst og fremst, verið miskunnsöm og reynið að hafa meðaumkun með ykkur og öðrum.“