Smjör spilar veigamikið hlutverk í matargerð og margir sem passa sig á að eiga alltaf smjörstykki inni í ísskáp, nú eða á eldhúsborðinu, enda í góðu lagi að sleppa því að kæla smjörið.
Sjá einnig: Sannleikurinn um smjör.
Smjöri, hvort sem það er stórt eða smátt, er pakkað inn í eins konar álpappírsumbúðir og oftar en ekki lenda þær í ruslinu þegar smjörstykkið er búið. Það flokkast hins vegar sem matarsóun.
Sjáiði til, þegar smjörstykkið er búið eru enn leifar af smjöri fastar við umbúðirnar. Ef að smjörið er við stofuhita geta þessar leifar verið talsverðar því mjúka smjörið festist frekar við téðar umbúðir. Umbúðirnar geta því nýst í matargerð þó smjörið sé búið. Til dæmis er hægt að nota pappírinn til að smyrja ýmiss konar kökuform. Þá geta smjörleifarnar einnig dugað til að smyrja pönnu þegar á að steikja eitthvað í kvöldmatinn. Einnig er þjóðráð að setja umbúðirnar á milli til dæmis hrárra hamborgara áður en þeir eru frystir.
Þannig að, við mælum með að þið geymið umbúðir utan af smjöri í litlum ílátum eða fjölnota plastpokum inni í frysti. Þessar umbúðir gætu nefnilega sparað ykkur nokkrar krónur í heimilishaldinu.