„Við erum með alls 300 gerðir af bolum og ber þar mest á hljómsveitarbolum og kvikmyndabolum,“ segir Hrafn Varmdal sem rekur Bolabankann í Kolaportinu. Úrvalið er sláandi en Hrafn segir að viðskiptavinahópurinn sé mjög breiður enda liðin tíð að aðeins unglingar gangi um í hljómsveitarbolum. Ljóst er að margir geta fundið bol með mynd af uppáhaldshljómsveitinni sinni í Bolabankanum og svo er líka mjög gaman að bara skoða allt úrvalið.
„Unglingar, harðfullorðið fólk og erlendir ferðamenn, það er bara öll flóran sem verslar hérna,“ segir Hrafn. Dökkir bolir með þekktum rokkhljómsveitum eru mest áberandi og segir Hrafn að rokkið sé fyrirferðarmeira en létt popp í hljómsveitarúrvalinu.
Gleraugu í öllum styrkleikum á aðeins 1.200
Bolirnir í Bolabankanum eru margir en gleraugun í Gleraugnabankanum, sem Hrafn rekur líka, virðast óteljandi. Hann býður upp á gleraugu sem henta öllum tilfellum af nærsýni og fjærsýni. „Við erum líka með mínus-gleraugu sem er sjaldgæft nema í sérstökum gleraugnaverslunum. Við erum líka með alla styrkleikakvarða með 0,25 millibili,“ segir Hrafn.
Hafi fólk látið mæla í sér sjónina getur það keypt samsvarandi gleraugu í Gleraugnabankanum, nema fólk sé með sjónskekkju eða önnur sérstök vandamál. Aðeins eitt verð fyrir öll gleraugu: 1.200 krónur.
Hrafn segir að gaman sé að starfa í Kolaportinu því mannlífið þar er mjög fjölbreytt. „Mér virðist tilhneigingin samt alltaf vera sú að erlendu ferðamennirnir eru hér frá kl. 11 til 13 og svo þegar líða tekur á daginn koma Íslendingarnir,“ segir Hrafn.
Kolaportið, Tryggvagötu 19, er opið laugardaga og sunnudaga í sumar frá kl. 11 til 17. Sjá nánar á vefsíðunni kolaportid.is.