„Við viljum veita fólki þá tilfinningu að það sé að stíga inn í aðra vídd,“ segir Oddur Goði Jóhannsson, veitingastjóri á Burro. Staðurinn hefur verið opinn í rúmlega tvö ár og er í hjarta bæjarins, við Veltusund 1, gegnt Ingólfstorgi. Suður-amerískur andi svífur þar yfir vötnum sem endurspeglast í matargerð og líflegu umhverfi þar sem sterkir litir njóta sín, ekki síst í eftirminnilegum veggmyndum eftir listakonuna Kristínu, en hún var jafnframt einn af smiðunum sem unnu að innréttingum staðarins.
„Við leggjum áherslu á létta stemningu og viljum fá fólk til að gleyma rigningunni. Við leggjum líka mikið upp úr alúðlegri og vinalegri þjónustu,“ segir Oddur og er þetta fyllilega í samræmi við upplifun okkar af staðnum. En þrátt fyrir léttleikann og litadýrðina þá er er Burro klárlega veitingastaður í fínni kantinum en mikið lagt í matreiðsluna af gæðum, fjölbreytni og sköpunargáfu.
Meginlínan á Burro eru tapas-réttir og steikur. Hver einasti réttur sem bragðað var á þetta kvöld var eftirminnilegur, ögraði skynfærunum og gældi við bragðlaukana.
Byrjað var á Tequendos, stökkum ostastöngum með Burro-sósu. Stangirnar eru ljúffengar og sósan er sterk en það tekur dálitla stund að verða var við það.
Kaldur túnfiskur (Tuna ceviche með tígrismjólk, kóríander, rauðlauk, avókadó og ristuðum maís) var frískandi og bragðgóður.
Síðan komu á borðið humar taco og andar taco í vefjum. Best er að leggja vefjurnar saman og borða í höndunum. Humarrétturinn var afar ljúffengur og andar taco er mjög eftirminnilegt, sætt og einstaklega bragðgott.
Í aðalrétt var snædd kálfasteik. Ljóst kjöt, létt og mjög meyrt. Í meðlæti er meðal annars sæt lauksulta sem gerir þetta að lengra og litríkara ferðalagi. Mjög milt ítalskt rauðvín passaði vel með kjötréttinum.
Hver réttur er upplifun, alveg yfir í eftirréttina en þar var valið djúpsteikt deig með sítrónu-sorbet. Deigið mjúkt og ljúft en sítrónuísinn kaldur, hressandi og mátulega sætur.
Heimsókn á Burro er upplifun, ferðalag inn í matarmenningu S-Ameríku og kærkomin tilbreyting frá gráu og blautu íslensku sumri.