Lopapeysuballið, sandkastalakeppnin og götugrillið eru á meðal hápunkta hátíðarinnar Írskir dagar á Akranesi sem verður glæsilegri með hverju árinu sem líður. Mikið líf er í bænum meðan á hátíðinni stendur, höfðað er sterklega til fjölskyldufólks og brottfluttir Akurnesingar og vandamenn þeirra láta sjá sig í stórum hópum.
„Hátíðin hefst venjulega á fimmtudeginum en í ár er eitthvað af viðburðum að detta inn á dagana þar á undan. Okkar frábæra fiðlusveit Slitnir strengir er til dæmis að undirbúa tónleika sem munu fara fram á miðvikudeginum og ég veit af fleiru sem er verið að undirbúa en ekki alveg komið á hreint, svo það er ekki hægt að greina frá því opinberlega á þessari stundu. Það er þó ljóst að á fimmtudeginum verður árleg grillveisla hjá Húsasmiðjunni, söguganga innblásin af fullveldisafmælinu og fleira áhugavert á dagskrá,“ segir Ella María Gunnardóttir, talsmaður hátíðarinnar.
Hápunktur föstudagsins að mati Ellu er götugrillið sem hefst kl. 18 og er á víð og dreif um bæinn. Fjölmargir bæjarbúar láta þá hendur standa fram úr ermum og halda hátíðargestum grillveislu. Á föstudeginum er jafnframt búið að koma fyrir leiktækjum í bænum. Um kvöldið eru síðan stórtónleikar á hafnarsvæðinu.
Hátíðin nær hámarki á laugardeginum: „Það er þéttpökkuð dagskrá frá morgni og fram á nótt. Um morguninn er opið golfmót, dorgveiðikeppni og hin fræga sandkastalakeppni sem klárlega er einn af hápunktum hátíðarinnar, að minnsta kosti hjá minni fjölskyldu,“ segir Ella María. Fjölbreytt dagskrá er á Akratorgi og ýmislegt í gangi víða í bænum allan daginn.
Um kvöldið er síðan mikið um dýrðir, að sögn Ellu Maríu:
„Klukkan tíu um kvöldið hefst brekkusöngur við knattspyrnuvöllinn sem hópurinn Club 71 stendur fyrir og eftir brekkusönginn gengur öll strollan síðan niður á Lopapeysuballið sem er nú haldið í 15. skipti.“
Á Lopapeysuballinu koma ávallt fram stærstu nöfnin í íslensku tónlistarlífi á hverjum tíma og nú styttist í að við fáum að vita hvaða snillingar verða á sviðinu í ár.
Lopapeysuballið fer fram bæði inni og úti. „Inni í gamalli sementsskemmu er leikið fyrir dansi á einu sviði, í tjaldi úti er annað svið og síðan er stórt afgirt svæði úti þar sem er veitingasala.“
Á sunnudeginum tekur hátíðin að róast en þá er vinsælt hjá foreldrum að fara með börn sín í Garðalund þar sem boðið verður upp á leiksýninguna Gosa sem Leikhópurinn Lotta flytur. Þar verður funhiti á grillunum þannig að fólk getur smellt á grillin og átt virkilega notalega fjölskyldustund.
Frítt er inn á meirihluta viðburða á hátíðinni en selt er inn á Lopapeysuballið og það kostar í leiktæki. Þá kostar jafnframt inn á tjaldsvæðið en yfir hátíðina er aldurstakmarkið þar 23 ár.
Írskir dagar eru haldnir árlega til að halda hátíðlega upp á írska arfleifð Akraness en Írar námu land á Skaga á fyrstu árum Íslandsbyggðar. Á hátíðinni hefur til dæmis löngum verið boðið upp á írska tónlist og fyrirlestra og verður eitt og annað af írskum uppruna í boði í ár. Þá er jafnframt valinn rauðhærðasti Íslendingurinn og í verðlaun er flug fyrir tvo til Írlands.
Nánari upplýsingar um hátíðina er að finna á Facebook-síðunni Írskir dagar á Akranesi og vefslóðinni akranes.is/is/dagatal.
