Í annarlok fyrir jól er mikil uppskeruhátíð í Tónskóla Sigursveins og hundruð nemenda koma fram á fjölbreyttri flóru tónleika, en alls eru haldnir um 25 tónleikar í desember. Mjög öflugt samspil er í Tónskóla Sigursveins, starfandi eru fjórar strengjasveitir, fjórar gítarsveitir, flautukór, fimm rytmasveitir og sex píanóhringekjur, fyrir utan þá kennslu sem fram fer í hóptímum í forskólanum og Suzukihóptímum. Suzukideildin hélt glæsilega fullveldistónleika 1. des. þar sem flutt var íslensk tónleikadagskrá. Á gítarsveitartónleikunum kom í fyrsta skipti fram nýstofnuð gítarsveit áhugamanna fyrir nemendur á framhaldsstigi og kennara.
Samstarf við Hólabrekkuskóla og FB
Starfsstöð Tónskóla Sigursveins í Hraunbergi 2 er beint á móti Fjölbrautaskólanum í Breiðholti og Hólabrekkuskóla og þar hefur þróast náið samstarf síðustu tvö árin. Allir nemendur í 1., 2. og 7. bekk Hólabrekkuskóla hafa fengið tónlistarkennslu í Tónskóla Sigursveins og í Fjölbrautaskólanum í Breiðholti hefur verið boðið upp á tvo 5 eininga tónlistaráfanga í rytmískri deild Tónskólans sem gæti orðið vísir að tónlistarbraut.
Píanó Plús
Áhugasömum píanónemendum á framhaldsstigi er boðin þátttaka í námskeiðinu Píanó Plús sem boðið er upp á hálfsmánaðarlega í Tónskóla Sigursveins. Lögð er áhersla á tækni, túlkun og sviðsframkomu og nemendum alls staðar af landinu er boðin þátttaka.
Samstarf við hljómsveitir erlendis
Tónskóli Sigursveins er einnig í samstarfi við hljómsveitir erlendis, – Youth Chamber Orchestra í Fíladelfíu og Jugend Symphonie Orchester Tulln í Austurríki en sú síðarnefnda hélt glæsilega tónleika í nóvember þar sem fram komu einleikarar á píanó úr Tónskóla Sigursveins og Strengjasveit Tónskólans.
Sinfóníuhljómsveit tónlistarskólanna
Hljómsveitarnámskeið Sinfóníuhljómsveitar tónlistarskólanna í janúar sem lýkur með tónleikum 23. janúar í Langholtskirkju þar sem flutt verður sinfónía eftir C. Franck, Mozart-aríur og sembalkonsert. Sinfóníuhljómsveit tónlistarskólanna er samstarfsverkefni Tónskóla Sigursveins og tónlistarskólanna í Kópavogi, Garðabæ og Hafnarfirði, – og er nemendum á framhaldsstigi á öllu landinu boðin þátttaka.
Concerto grosso – Viking Barokk
Níunda febrúar verða haldnir síðustu tónleikarnir í samnorrænu verkefni sem kallast Concerto grosso – Viking Barokk, og koma þar fram fjórar atvinnumannasveitir í barokktónlist og meira en 100 nemendur frá Finnlandi, Svíþjóð, Noregi og Íslandi. Sams konar tónleikar voru haldnir í Ósló og Helsinki í nóvember og í janúar verða tónleikar í Stokkhólmi. 45 nemendur úr Tónskóla Sigursveins og Tónlistarskóla Kópavogs taka þátt í tónleikum erlendis og á Íslandi bætast við um 50 yngri nemendur.
Leikskólaverkefni
Leikskólaverkefnið er árlegt samstarfsverkefni Tónskóla Sigursveins og meira en 30 leikskóla í Reykjavík og árið 2019 verða lög eftir Jóhann G. Jóhannsson á dagskrá. Lögin eru útsett fyrir söng leikskólabarnanna og litla hljóðfærahópa. Hljóðriti og nótum er dreift í leikskólana þar sem leikskólakennararnir kenna og æfa með börnunum í nokkrar vikur. Öll leikskólabörnin heimsækja Tónskóla Sigursveins í um 40 manna hópum, syngja lögin við undirleik nemenda í Tónskólanum. Lokapunktur verkefnisins er opnun Barnamenningarhátíðar í Hörpu þar sem 600 leikskólabörn og um 120 nemendur úr Tónskólanum koma fram.
Hægt er að sækja um námsvist í Tónskóla Sigursveins á heimasíðu skólans, tonskolisigursveins.is, og á rafraen.reykjavik.is.
Upplýsingar um tónleika er að finna á Facebook-síðunni Tónskóli Sigursveins D. Kristinssonar.