Dagatal 2019 með umbununarkerfi
Dagatalið frá Amikat er hin mesta heimilisprýði en það hannaði listamaðurinn Íris Halldórsdóttir ásamt vinkonu sinni, Dagnýju Skarphéðinsdóttur, grafískum hönnuði. Dagatalið hefur að geyma tólf gullfallegar vatnslitamyndir með skemmtilegu dýraþema og er gott pláss fyrir hvern dag sem hægt er að skrifa inn í. Vatnslitamyndirnar eru ævintýralegar með skemmtilegum sirkusdýrum og fallegum fjöðrum. „Dagatölin falla sérstaklega vel í kramið hjá barnafjölskyldum. Margar stelpur eru að klippa myndirnar út eftir hvern mánuð og hengja upp í herberginu sínu. Einnig fylgja með tvær sérmálaðar límmiðaarkir með skemmtilegum límmiðum fyrir alls konar tilefni. Á meðal límmiðanna eru 24 stjörnur sem tilvalið er að nota sem umbununarkerfi fyrir börnin eða húsbóndann á heimilinu,“ segir Íris og hlær.
Vandaðar eftirprentanir og fallegar nælur
Íris selur einnig fallegar og vandaðar eftirprentanir af ýmiss konar vatnslitamálverkum. „Nýlega setti ég í sölu eftirprentun af einhyrningi sem ég málaði af íslenskum hesti sem ég setti í örlítið meira töfrandi búning. Myndin er prentuð í takmörkuðu upplagi og fæst afhent bæði í hvítum ramma og í viðarhengi og hentar í jólapakkann hjá ævintýraunnendum,“ segir Íris.
Einnig eru til skemmtilegar eftirprentanir af pöndu og ref og hefur Íris framleitt nælur með þeim myndum auk þess sem hún selur hálsmen með pöndunni. „Þessar smávörur hafa oftar en ekki ratað í poka jólasveinsins eða sem vinkonugjafir í skólanum,“ segir Íris.
Vörurnar má nálgast á heimasíðunni www.amikat.is og er boðið upp á fría heimsendingu á öllum vörum.