Silfra er einn besti köfunarstaður á Íslandi og af mörgum talinn vera á heimsmælikvarða. Ástæðan er mikið skyggni í tæru grunnvatninu og stórfenglegt umhverfi Silfru. „Þetta er á skilunum þar sem Evrópuflekinn og Ameríkuflekinn færast í sundur og þau færast um tvo sentimetra á ári,“ segir Héðinn Þorkelsson hjá köfunarþjónustunni Diving Island, en hann fullyrðir að Silfra sé alltaf vinsæll köfunarstaður á meðal heimafólks og ferðamanna.

Héðinn er stofnandi Diving Island og sinnir þjónustunni ásamt Einari Erni Ágústssyni, en köfunarfyrirtækið hefur hlotið stórgóðar undirtektir á vefnum TripAdvisor. Þar eru flestir ummælendur sammála um faglega þjónustu með persónulegum blæ og fróðleik. Þjónustan hófst í fyrrasumar og hafa viðtökur verið vonum framar.

Héðinn hefur verið virkur kafari í tæp fimmtán ár og segir að þótt enginn skortur sé á köfunarþjónustu, skipti miklu máli að veita fræðslu og persónulega þjónustu. Segir hann það vera ástæðuna fyrir því að Diving Island hugsi smærra og vilji bjóða upp á ferðir með færra fólki í einu. Einnig bætir hann við að það sé mikil samkeppni um snorklið.

„Það er fjöldi fólks sem fer í það, ekki síst vegna þess að skilyrði vegna köfunar í Silfru eru þrengri. Maður þarf til dæmis að hafa köfunarréttindi en þetta eru að mestu snorklarar hjá okkur núna og mikið sóst eftir því. Við reynum að veita fólki sem besta upplifun.“