Hraunborgir – fjölskylduvæna tjaldsvæðið – Skemmtileg sundlaug, golfvöllur, minigolf, beinar útsendingar og margt fleira
Hraunborgir í Grímsnesi bjóða upp á fjölbreytta möguleika fyrir ferðalanga. Falda perlan í Hraunborgum er hins vegar tjaldsvæði sem stendur skammt frá orlofshúsabyggð. Tjaldsvæðið er ekki stórt í samanburði við mörg af þekktari tjaldsvæðum en hefur upp á mikla fjölbreytni að bjóða. „Við hugsum þetta sem fjölskylduvænt tjaldsvæði þar sem fjölbreytt afþreying er í boði,“ segir Guðmundur Svavarsson, umsjónarmaður Hraunborga.
Skemmtileg sundlaug er í Hraunborgum og er þar jafnan fjör á sumrin. Golfarar finna allt fyrir sitt áhugamál við Hraunborgir. Golfvöllurinn – Ásgeirsvöllur – er stuttur níu holu völlur þar sem allar holur eru par 3. „Völlurinn hentar vel byrjendum og er hann vel sóttur af fólki sem er að feta sig áfram í íþróttinni. Lengra komnir æfa gjarnan stutta spilið hér,“ segir Guðmundur. Vallargjald er aðeins 1.900 krónur og gildir fyrir allan daginn. Minigolfvöllur er einnig að Hraunborgum og fastur liður er að haldin eru golfmót á báðum völlum um verslunarmannahelgina og hafa mótin verið vel sótt. Vaxandi fjöldi fólks leggur leið sína að Hraunborgum um verslunarmannahelgi og nýtur lifandi tónlistar og samveru í barnvænu umhverfi.
Einn kostur svæðisins er hvernig það er byggt upp. „Fólk kemur hingað á bílnum og leggur honum og allt er í göngufæri.“ Guðmundur segir allar nauðsynjar, eins og brauð og mjólk, til sölu í móttökunni ásamt ís, gosi, djús, góðum veigum og þess háttar í Hraunborgum.
Vistleg setustofa býður upp á þægilega stund og beinar útsendingar yfir sumarið eru í boði þegar þurfa þykir og hægt er að njóta bjórs og léttvíns úr kæli. Setustofan hefur nýlega verið stækkuð og endurbætt og húsgögn endurnýjuð. Leiktæki eru einnig á staðnum og leiktæki fyrir börn utandyra. Allir geta fundið eitthvað við sitt hæfi að Hraunborgum, þessari perlu í Grímsnesinu sem sífellt fleiri fá vitneskju um.