Sumarið er tíminn segir í lagi eins af ástsælustu tónlistarmönnum þjóðarinnar, Bubba Morthens, sem er einmitt nýbúinn að fagna afmæli sínu í byrjun sumars. Og það er svo sannarlega rétt hjá honum, sumarið er tíminn.

Tíminn þegar fréttaveitan manns á Facebook fyllist af myndum af brosandi fallegum börnum sem eru að klára skólaveturinn og hlakka til að komast á leikjanámskeið eða í önnur verkefni sumarsins og iðulega fylgja myndunum orð foreldra sem eru að springa af monti yfir afkvæminu.

Tíminn þegar maður dustar rykið af garðhúsgögnunum og grillinu, ekki sófaborðinu og stofuhillunum.

Tíminn þegar grilllykt og lykt af nýslegnu grasi fyllir vitin alla daga.

Tíminn þegar maður vaknar eldsnemma og fer seint að sofa, enda ekki svefnfriður þegar er orðið bjart inni hjá manni um miðja nótt (muna að kaupa gluggatjöld).

Tíminn þegar þvottavélin er full á mánudegi af útilegufatnaði helgarinnar, grasgrænum fótboltagöllum og sundfatnaði.

Tíminn þegar dagatalið hjá manni fyllist af boðum í útskriftarveislur, afmæli og garðpartí, tónleikum, bæjarhátíðum og fleiri skemmtilegum viðburðum. (Því miður bara einni utanlandsferð enn sem komið er).

Tíminn þegar engum finnst athugavert að kona fái sér jarðarber og hvítvín sem hádegismat, svona allavega um helgar.

Tíminn þegar hjörtun vakna upp af doða vetrarins og fiðrildin fara á flug.

Tíminn þegar lundin verður betri, dagurinn verður bjartari og betri.

Í haust þegar sumri lýkur samkvæmt dagatalinu er gott að muna að halda sumrinu í hjarta og huga, þá er allt miklu bjartara, einfaldara og skemmtilegra.

Sumarkveðja, Ragna
ragna@dv.is