Orða Snakk – Sérð þú lausnarorðið?

Leikurinn sem allir og amma þeirra eru að spila

Jólin eru komin og farin fljótar en hendi og dagatalið á festi, en eitt af því sem situr eftir að loknum jólum er leikurinn Orða Snakk, sem bókstaflega allir sem eiga snjallsíma virðast hafa náð sér í yfir jólin og byrjað að spila.

En hvað er Orða Snakk og út á hvað gengur leikurinn? Orða Snakk heitir Word Snack á ensku og má sækja hann sem app í snjallsímann. Leikinn má spila á nokkrum tungumálum, eða alls 31, þar á meðal á íslensku, ensku, frönsku, þýsku og rússnesku (undirbúningur fyrir HM 2018?).

Leikurinn er einfaldur, eða alla vega virkar hann það. Sex eða sjö stafir eru í boði, sem á að raða saman til að mynda nokkur þriggja til sjö stafa orð. En það sem virðist einfalt er það ekki alltaf og oft horfir maður framhjá augljósasta orðinu og lausninni um leið.

Stig fást fyrir rétt orð og aukastig fyrir reiti með stjörnum á. Í boði er síðan að skipta stigunum út fyrir aðstoð, sem er samt dýru verði keypt: 120 stig fyrir einn staf. Einnig er í boði að spyrja vini með því að deila skjámyndinni inn á Facebook. Má segja að fréttaveitan hjá manni hafi einkennst af litlu öðru en slíkum hjálparbeiðnum síðustu daga, innan um myndir af jólatrjám týndum innan um jólapakka og vel útilátnum veisluborðum.

En Íslendingar eru eldsnöggir að taka við sér og láta sér ekki nægja að deila skjámyndum á Facebook-veggi sína og í einkaskilaboðum um aðstoð. Þegar þetta er skrifað hafa verið stofnaðir sex hópar á Facebook þar sem meðlimir hjálpast að við að leysa borðin eitt af öðru, fjölmennasti hópurinn telur yfir 1.100 meðlimi.

Ef þú ert einn af þeim örfáu sem átt eftir að ná þér í leikinn, hugsaðu þig vel um áður en þú sækir hann því hann er jafn ávanabindandi og grárra hára valdandi og hann er skemmtilegur. Ef þú ert þegar að spila hann þá vantar mig aðstoð með fimm stafa orð, í boði eru stafirnir R D Ý Á N og R.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.