Purusteikarborgarinn er mættur

Lebowski Bar, Laugvegi 20, 101 Reykjavík

„Já, hann er mættur,“ segir Haraldur Anton hjá Lebowski Bar, aðspurður hvort jólahamborgarinn sé kominn á matseðilinn. Jólaborgarinn hefur verið í boði undanfarin fimm ár og verður sífellt vinsælli. Að sögn Haraldar fara margir viðskiptavinir staðarins að spyrja eftir borgaranum þegar haustið gengur í garð. En hvað er í þessum vinsæla hamborgara:

„Kjötið er purusteik og síðan er það rauðkál, sultaður rauðlaukur, camembert-ostur, jólasinnepssósan okkar og þetta er síðan borið fram með sætum frönskum kartöflum,“ segir Haraldur.

Eldhúsið á Lebowski Bar er opið frá 11 á morgnana til tíu á kvöldin og er því hægt að gæða sér á purusteikarborgaranum í hádeginu eða kvöldmat. Svo skemmir ekki fyrir ef þessu er skolað niður með malt og appelsín, ja, eða bara einum ísköldum. Staðurinn sjálfur er opinn frá 11 til 01 á næturnar á virkum dögum og um helgar er opið framundir morgun eða til um 4.30.

Mynd: JAVIERBALLESTER.COM.ES

Lebowski Bar er vinsæll staður og hann sækir alls konar fólk. Að sögn Haraldar Antons er töluvert að gera í hádeginu: „Hingað koma til dæmis iðnaðarmenn og skólanemar og fá sér í svanginn í hádeginu og síðan er töluvert af erlendum ferðamönnum,“ segir hann.

Prýðileg kráarstemning er á staðnum á kvöldin og hefst raunar fyrr: „Fólk fer að streyma hingað inn um leið og „happy hour“ byrjar en það er alla daga frá klukkan 16 til 19. Þá er hægt að fá bjór eða rauðvínsglas á 750 krónur eða fá sérvalinn og dýrari bjór á 850 krónur. Við erum með alla aldursflóruna, fólk frá tvítugu og alveg upp í um 75 ára því við bjóðum upp á klassíska rokktónlist frá sjötta til níunda áratugarins sem höfðar jafnt til ungra sem þeirra eldri,“ segir Haraldur Anton. Þó fer Eagles aldrei á fóninn!

Nánari upplýsingar á Facebook-síðunni Lebowskibar og vefsíðunni lebowskibar.is.

Mynd: sr-photos.com
Mynd: sr-photos.com
Mynd: JAVIERBALLESTER.COM.ES

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.