Kom sér í sitt besta form með þessari einföldu aðferð

Það er algeng mýta að það að sneiða oft framhjá neyslu kolvetnaríkrar fæðu sé lykillinn að lögulegri og hraustari líkama. Hin ástralska Madalin Frodsham sýndi það og sannaði að það er ekki allskostar rétt þegar hún ákvað að taka næsta skref sitt í átt að hraustari líkama. Í stað þess að sneiða framhjá kolvetnum, jók hún neyslu þeirra til muna.

En kolvetni er ekki það sama og kolvetni. Til eru ýmsar gerðir kolvetna og eru tvær megingerðir þeirra einföld kolvetni og flókin kolvetni. Einföld kolvetni eru til dæmis sykrur sem finna má í ávöxtum en einnig venjulegur hvítur sykur sem við öll þekkjum. Flókin kolvetni eru aftur á móti annars eðlis og má finna þau til dæmis í kornvörum, sætum kartöflum og ýmsum baunum.

Flókin kolvetni, sem Madalin lagði áherslu á að innbyrða, stuðla að minni sveiflum á blóðsykri á meðan einföldu kolvetnin auka insúlínframleiðslu líkamans, sem aftur hægir á fitubrennslu líkamans.

Madalin hefur löngum haft mikinn áhuga á líkamsrækt og segir hún við Mail Online í Ástralíu að áður fyrr hafi einungis fimm prósent af þeim hitaeiningum sem hún neytti að jafnaði verið í formi kolvetna. Í dag nemur hlutfallið hins vegar 50 prósentum. Hún heldur úti vinsælli Instagram-síðu þar sem hún leiðir fylgjendur sína í allan sannleikann um aðferðir sínar til að ná árangri.

„Ég var komin með ógeð af mataræðinu mínu svo ég vildi prófa eitthvað nýtt,“ segir hún. Áður fyrr fylgdi hún lágkolvetnalífsstílnum, en í viðtalinu segir hún að hún hafi í raun verið komin með ógeð af því að leita stanslaust af fæðutegundum sem gætu komið í stað þeirra sem innihalda kolvetni.

Í stað þess að telja hverja einustu hitaeiningu sem hún lét ofan í sig einbeitir hún sér meira af undirstöðunum í mataræði hvers og eins; kolvetnum, fitu og prótínum. Hún ákvað að leita á náðir einkaþjálfara og næringarfræðings sem ráðlögðu henni að borða kolvetnaríkari fæðu. Í dag innbyrðir hún um 1.800 hitaeiningar á dag í stað um það bil 800 hitaeininga áður og má segja að árangurinn hafi ekki látið á sér standa.

Hún segir að þegar henni var ráðlagt að borða meira af kolvetnum hafi hún fengið áfall, hún hafði litla sem enga trú á að það myndi skila einhverju, nema þá helst fleiri kílóum. Þetta hafi þó vanist og í dag sé hún í miklu betra formi en áður, auk þess að líða betur á líkama og sál. „Ekki eyða tíma þínum í að borða salat þegar þú gætir verið að borða sætar kartöflur og bananapönnukökur. Borðaðu meira og komdu þér þannig í form. Það virkar,“ segir hún.

Þegar Madalin tók þessa ákvörðun, að borða meira af kolvetnum, var hún 52 kíló – og hún er enn 52 kíló, nema í talsvert betra formi auk þess sem vellíðan hennar frá degi til dags hefur aukist mikið. Madalin stundar líkamsrækt sex daga vikunnar, en þar af stundar hún jóga fjórum sinnum í viku.