Konur sem hyggja á barneignir vonast væntanlega flestar eftir því að fæðingin gangi hratt og vel fyrir sig. Jessica Stubbins, ung móðir frá Scunthorpe á Englandi, var vissulega ein þeirra, en í hennar tilfelli gekk fæðingin kannski aðeins of hratt fyrir sig.

Jessica sagði sögu sína í þættinum Good Morning Britain í morgun en þar var sýnt ótrúlegt myndband af því er Jessica fæddi dóttur sína, Lucy, fyrr á þessu ári.

Magnað Lucy var að flýta sér í heiminn.

Jessica og maður hennar, Tom, ákváðu, eðlilega, að drífa sig á fæðingardeildina eftir að Jessica missti vatnið. Hlutirnir gerðust nokkuð hratt í kjölfarið og þegar Jessica var komin á spítalann, nánar tiltekið í anddyrið, gat hún ekki meir. Þá voru aðeins liðnar sextán mínútur frá því að Jessica fann að fæðingin væri líklega að fara af stað.

Eins og sést á meðfylgjandi myndbandi hélt hún á dóttur sinni örfáum andartökum eftir að hún dró buxurnar niður. Tom missti af fæðingunni, en hann var að leggja bílnum á meðan Jessica dreif sig inn.

Þess má til gamans geta að Tom var að sjá myndbandið af fæðingunni í fyrsta sinn í þættinum í morgun. „Þegar ég kom inn sagði hún: „Þetta er stúlka, þetta er stúlka. Fyrirgefðu, fyrirgefðu“ af því að ég missti af fæðingunni. Hún var með samvisubit út af þessu. Mér var eðlilega mjög brugðið,“ segir hann.

Lucy er annað barn þeirra Jessicu og Toms.

Lucy litla var við mjög góða heilsu þegar hún kom í heiminn og var Jessica fljót að jafna sig eftir fæðinguna, enda gekk hún vonum framar. Sally, ljósmóðirin sem aðstoðaði litlu fjölskylduna eftir fæðinguna, hrósaði Jessicu í þættinum í morgun. „Hún hélt ró sinni allan tímann. Þetta var mjög góð og skemmtileg reynsla, hún stóð sig mjög vel.“

[youtube https://www.youtube.com/watch?v=Xq6p2iRY-_o&w=560&h=315]