Kettlingurinn Bobby var grandalaus um hugsanlegar afleiðingar þeirrar hættufarar að koma sér fyrir í þvottavél á heimili sínu í Nottingham á Englandi.

Bobby hafði fundið sér fullkominn stað til að hvíla sig á, innan um silkimjúkan þvottinn sem beið þess að verða þveginn. Það er einmitt það sem gerðist. Lisa Keefe, eigandi Bobby, var búin að setja þvottinn í vélina en brá sér frá í drykklanga stund. Á meðan kom Bobby sér fyrir í þvottavélinni og hann var þar enn þegar Lisa setti vélina af stað og stillti hana á 60 gráður.

Sem betur fer áttaði Lisa sig á að ekki væri allt með felldu þegar hún heyrði einkennileg hljóð koma úr vélinni. Hún stöðvaði vélina og þá kom í ljós að Bobby var í henni.

Lisa fór með kisa litla beinustu leið til dýralæknis sem viðurkennir, í viðtali við BBC, að hann hafi aldrei séð annað eins. Litlu mátti muna að Bobby dræpist og þurfti að gefa honum sprautu til að meðhöndla lost sem hann hafði fengið. Bobby náði samt sem áður góðum bata eftir þetta og fékk hann að fara heim daginn eftir. Lisa segir að Bobby sé var um sig eftir atvikið.

„Hann lærði sína lexíu og kemur ekki nálægt þvottavélinni lengur.“