Hafragrautur er allra meina bót – Ódýr og stuðlar að hraustari líkama
Það er líklega engum ofsögum sagt að morgunmaturinn sé mikilvægasta máltíð dagsins. Það hvað við borðum á morgnana hefur áhrif á líðan okkar þann daginn og því er mikilvægt að borða rétt áður en haldið er út í amstur dagsins.
En hvað eigum við að borða til að tryggja líkamanum góða og heilbrigða næringu? Næringarfræðingurinn Cassandra Barns segir að hafragrauturinn sé besti morgunmatur sem völ er á. Hún deildi með lesendum Daily Mail á dögunum fimm ástæðum þess að við ættum að venja okkur á að borða þennan sígilda graut alla morgna.
Hafrar eru góðir að því leytinu að þeir hækka ekki blóðsykurinn hratt eins og einföld kolvetni gera. Þeir hafa lágan sykurstuðul og veita líkamanum stöðuga orku. „Og, ólíkt til dæmis ýmsum tegundum morgunkorns, innihalda þeir ekki viðbættan sykur,“ segir Cassandra við Daily Mail. „Þetta þýðir að orkustig líkamans helst stöðugt þar til kemur að næstu máltíð, hádegismatnum.“
„Hafrar eru trefjarík fæða og innihalda mikilvæg vítamín og steinefni, þar á meðal vítamínið B1, magnesíum, járn, mangan og sink,“ segir Cassandra. Hún segir að þessi vítamín og steinefni gegni mikilvægum hlutverkum í líkamanum. Þau stuðla meðal annars að því að við höfum næga orku og ekki síður að því að ónæmiskerfi okkar sé í stakk búið til að berjast gegn ýmsum pestum og þá ýta þau undir ónæmisvarnir líkamans.
Eins og áður segir teljast hafrar til flókinna kolvetna sem þýðir að orkan sem þeir gefa okkur frásogast hægt út í blóðrásina. Þetta er sérstaklega gagnlegt þeim sem stunda líkamsrækt af kappi. „Það er sniðugt að borða eina skál af hafragraut, annaðhvort áður en haldið er í ræktina eða eftir hana. Magnesíum-innihaldið er einnig nauðsynlegt fyrir góða vöðvastarfsemi,“ segir Cassandra.
## Hægt að prófa ýmsa útfærslu
Hafragrautur er ekki bara hafragrautur. Það er mjög auðvelt að auka gæði hans með því að bæta út í hann hollri fitu eða prótínum. Cassandra bendir réttilega á að sniðugt sé að bæta berjum sem innihalda mikilvæg andoxunarefni eða C-vítamín. Þá er hægt að bæta hnetum eða fræjum út í til að auka prótíninnihald hans og hlutfall hollrar fitu. Þá bendir Cassandra á að hægt sé að bæta kanil út í sem hjálpar meðal annars til við að koma jafnvægi á blóðsykurinn.
„Trefjarnar í höfrunum geta hjálpað okkur að lækka kólesteról í blóði,“ segir Cassandra og bætir við að hafrarnir innihaldi beta-glúkan sem stuðlar að því að kólesteról komist ekki í blóðrásina. Þá bendir Cassandra á að trefjaefni hjálpi okkur að viðhalda okkar eðlilegu þyngd sem aftur lækkar líkur á að sykursýki af tegund 2.
