„Fer áfram á hörkunni“

Emma Lind var greind með illkynja krabbamein fyrir nokkrum dögum.

„Þetta var mikið sjokk og auðvitað brotnuðum við niður. En við erum rosalega sterk fyrir hana og við reynum að halda haus yfir þessu öllu þó það sé rosalega erfitt,“ segir Anna Margrét Sævarsdóttir, móðir Emmu Lindar Aðalsteinsdóttur en þriggja ára dóttir hennar og Aðalsteins Grétars greindist með krabbamein í byrjun mánaðarins.

„Emma greindist með æxli 2. mars en illkynja krabbamein 5. mars. Það er ekki vitað hvað þetta heitir nákvæmlega,“ segir Anna en æxlið er staðsett milli þvagblöðru og ristils, í grindarbotninum. „Það er farið að þrýsta á öll líffærin þarna í kring enda er það orðið 12 sentimetrar þar sem það er lengst.“

Urðu vör við einkenni

Foreldrar Emmu urðu áhyggjufullir þegar þeir urðu varir við einkennileg einkenni hjá Emmu. Hún hafði haft blóðbleika útferð síðan í janúar að sögn móður hennar. „Hún var búin að fara til læknis út af því. Þar var ekkert sérstaklega greint í því nema hún var einnig með streptókokka í klofi og endaþarmi sem fóru svo með sýklalyfjum á tveimur vikum. Eftir það fór meira blóð að koma og þá fékk ég tíma í speglanir 8. mars. En 1. mars ákvað ég að fara með hana uppeftir því þetta var farið að líta illa út,“ segir hún.

Fer áfram á hörku og þrjósku

Anna Margrét segir erfitt að horfa upp á barnið sitt svona veikt. „Það er hræðilegt. Mér finnst að það ætti ekki að vera til að börn fái svona veiki eða þurfi að liggja lengi inni á sjúkrahúsi. En við höfum reynt að takast á við þetta og taka bara einn dag í einu. Eins og maður segir, það er ekki lagt meira á mann en maður þolir,“ segir hún.

Emma Lind er að sögn móður hennar lífsglöð stelpa sem hefur mikinn áhuga á söng og dansi. „Emma Lind er mjög skemmtilegur karakter, alltaf brosandi og mjög lífsglöð stelpa. Hún hefur rosalegan áhuga á söng og dansi og er einmitt í söngskóla Maríu Bjarkar. Hún þurfti að hætta þar í miðju námskeiði vegna veikindanna. Hún fattar auðvitað ekki alveg hvernig þetta virkar – þetta með veikindin, en hún er mjög hörð í sér og fer áfram á hörkunni og þrjóskunni,“ segir Anna Margrét.

Tekur á andlegu hliðina

Emma Lind hefur nú dvalið á Barnaspítala Hringsins í rúmlega viku ásamt foreldrum sínum. „Við þurfum að vera hérna í um það bil tvær vikur í viðbót allavega – ef allt fer á réttan veg. En dagarnir eru misjafnir bæði hjá okkur foreldrunum og Emmu Lind. Þetta tekur rosalega á andlegu hliðina líka,“ viðurkennir hún.

Það væsir ekki um Emmu Lind á Barnaspítalanum. „Hún vill ekki fara heim af spítalanum því hérna fær hún þvílíka þjónustu allan daginn og endalaus verðlaun. Hún er rosalega dugleg í gegnum þetta allt og leyfir læknunum alveg að taka blóðprufur, gefa henni lyf og mæla, pikka og pota.“

Vonast til þess að æxlið minnki

Emma Lind byrjar í lyfjameðferð í næstu viku, æxlið vex hratt og vonast er til þess að það minnki á sama hraða þegar lyfjameðferð hefst.

„Við verðum að vera hérna á spítalanum fyrstu tvær vikurnar en fyrsta meðferðin er sjö vikur. Við megum fara heim eftir fyrstu tvær og koma svo bara alltaf þegar hún þarf að fara í lyfjagjöf. Svo fer hún aftur í meðferð eftir þessar vikur og þegar það er búið að reyna að minnka æxlið eins mikið og þeir geta þá fer hún í aðgerð. En þetta ferli tekur að minnsta kosti 6 mánuði.“

Kostnaðarsamt

Anna Margrét er í fæðingarorlofi um þessar mundir en systir Emmu, Alba Sædís, er fjögurra mánaða. Faðir Emmu hefur verið í fríi frá vinnu síðan Emma greindist. „Þetta verður svo bara að skýrast,“ segir hún um það, en lyfjameðferðin mun líklega verða kostnaðarsöm og þungur baggi að bera fyrir litlu fjölskylduna.

Anna Margrét hefur því tekið upp á því að selja kerti til styrktar Emmu Lind og guðfaðir hennar stofnaði styrktarreikning fyrir hana. Fyrir þá sem vilja leggja sitt af mörkum þá er reikningsnúmerið: 515-14-407100,kt. 130908-2330 og hægt er að nálgast kertin á Facebook-síðu Önnu Margrétar.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.