Stefán Hrafn Sigfússon, bakari hjá Mosfellsbakarí, á köku ársins 2012 en í sigurlaun hlaut hann peningaverðlaun frá Landsambandi bakarameistara, LABAK, og glæsilega gjafakörfu frá Freyju.

Átján kökur bárust í keppnina sem er metþátttaka en þetta er í annað skiptið á þremur árum sem Stefán Hrafn bakar köku ársins. Hann bakaði einnig köku ársins fyrir árið 2010.

Kakan í ár inniheldur meðal annars ljúffenga karamellu, hnetur og súkkulaði. Að venju er mikið í kökuna lagt, hún er samsett úr mörgum gómsætum lögum og hjúpuð með karamellu- og súkkulaðihjúp, segir í fréttatilkynningu frá LABAK.

Dómarar í keppninni voru Þóra Ólafsdóttir frá Samtökum iðnaðarins, Olga Sigurðardóttir frá sælgætisgerðinni Freyju og Ásgeir Þór Tómasson, deildarstjóri bakaradeildar Hótel- og matvælaskólans.

Sala á kökunni hefst um helgina í bakaríum félagsmanna LABAK um allt land og verður til sölu það sem eftir er ársins.