Hörmulegt banaslys varð í Reynisfjöru í vikunni. Erlendur ferðamaður lést eftir að kröftug alda reið yfir hann. Umræðan sem hefur verið um þennan mikla ferðamannastað undanfarin misseri hefur verið mikil. Stundum jafnvel æsingakennd.
Nú er rætt um vöktun á svæðinu og jafnvel einhvers konar lögreglu á ströndinni. Er það eitthvað sem okkur hugnast? Viljum við skilgreina hættulega staði fyrir ferðamenn og setja þar upp vöktun? Hvað með Krísuvíkurbjarg, Dettifoss, Glym og jafnvel Esjuna? Allt eru þetta hættulegir staðir ef fólk fer óvarlega.
Við seljum mörgum ferðamanninum þá ímynd af Íslandi að landið sé óspillt og fagurt. Við sem erum svo lánsöm að búa hér alltaf, viljum svo gjarnan að ferðamenn fái að njóta náttúrufegurðarinnar með okkur.
Sennilega er hættulegasti ferðamannastaðurinn á Íslandi Hringvegurinn sjálfur. Þjóðvegur númer eitt, með sínum einbreiðu brúm, hálku sem óvanir bílstjórar eiga auðvelt með að misreikna og bílum sem ljósmyndaþyrstir ferðamenn stökkva út úr í tíma og ótíma. Við erum með vöktun á þjóðvegi eitt. Þar er lögreglan við störf. Engu að síður er slysatíðni mikil og ferðalangar, innlendir og erlendir, látið lífið.
Verðir á ferðamannastöðum munu engu bjarga. Fólk fer þangað sem það vill. Eigum við ekki bara að leyfa það áfram en um leið uppfræða ferðamennina betur um hætturnar? Á Íslandi eru náttúruöflin kröftug og um leið fögur og geta verið hættuleg. Níu ár eru frá því að ferðamaður fórst síðast í Reynisfjöru. Miðað við þann gríðarlega fjölda sem sækir staðinn heim segir það meira en mörg orð. Setjum upp viðvörunarskilti og fræðum ferðamenn en missum okkur ekki í eftirlitinu. Í öllum löndum eru hættur ef ekki er farið varlega. Þær eru nefnilega víða Reynisfjörurnar og ekki bara hér á landi. Fræðum ferðamenn sem hingað koma og, umfram allt, minnum þá á að þeir eru hér á eigin ábyrgð og eru velkomnir. Eyðileggjum ekki upplifunina með enn einni eftirlitsstofnuninni.