Á heimasíðu bandaríska utanríkisráðuneytisins er sagt að Bandaríkin hafi verið fyrsta ríkið til að viðurkenna sjálfstæði Íslands árið 1944. Eftir að landið hafi verið undir dönsku krúnunni og síðar hertekið í seinni heimsstyrjöldinni af Bretum … og Þjóðverjum, eins og segir á heimasíðunni. Vissulega vildi Hitler leggja Ísland undir og áætlun var til á teikniborði einræðisherrans sem nefndist Íkarus. Vegna tafa annars staðar á vígvöllum Evrópu varð hún aldrei að veruleika. Sumir hafa sagt að svo augljós staðreyndavilla á heimasíðu æðstu stofnunar Bandaríkjanna í utanríkismálum rýri traust til hennar. Hugsanlega hafa forsvarsmenn ráðuneytisins tekið skáldsögu Vals Gunnarssonar, Örninn og fálkinn, of alvarlega en hún fjallar um hernám Þjóðverja á Íslandi.